કચ્છ, 12 જુલાઈ (હિ.સ.) : ભુજ શહેરમાં લાંબા સમયથી કોર્ટ દ્વારા જારી કરાયેલા સજા વોરંટની અમલવારીથી બચી રહેલા એક આરોપીને આખરે ભુજ શહેર બી ડિવિઝન પોલીસે ઝડપી પાડી જેલ હવાલે કર્યો છે. છેલ્લા એક વર્ષથી વધુ સમયથી ફરાર રહી કાયદાની પકડથી દૂર રહેવાનો પ્રયાસ કરનાર આરોપી સામે પોલીસે ચોકસાઈપૂર્વક સર્વેલન્સ અને બાતમીદારોના નેટવર્કના આધારે સફળ કાર્યવાહી હાથ ધરી હતી.

પશ્ચિમ કચ્છ જિલ્લામાં કોર્ટના સજા વોરંટ અને પકડ વોરંટની અસરકારક અમલવારી સુનિશ્ચિત કરવા માટે, પોલીસ મહાનિરીક્ષક ચિરાગ કોરડીયા, પોલીસ અધિક્ષક વિકાસ સુંડા તથા નાયબ પોલીસ અધિક્ષક ડૉ. વિશ્વા શાહના માર્ગદર્શન હેઠળ, વિશેષ અભિયાન ચલાવવામાં આવી રહ્યું છે. આ અભિયાન અંતર્ગત ભુજ શહેર બી ડિવિઝન પોલીસ સ્ટેશનના પોલીસ ઇન્સ્પેક્ટર એ. એમ. હેરમાએ પોલીસ સ્ટાફને ફરાર આરોપીઓની શોધખોળ કરી કોર્ટના આદેશોનું કડક પાલન કરાવવા સૂચના આપી હતી.

તપાસ દરમિયાન સામે આવ્યું હતું કે, ચીફ જ્યુડિશિયલ મેજિસ્ટ્રેટ, ભુજની કોર્ટમાં ચાલેલા ફોજદારી કેસમાં એન.આઈ. એક્ટની કલમ 138 હેઠળ સજા પામેલો સંજયભાઈ મસાભાઈ ભરવાડ છેલ્લા એક વર્ષથી વધુ સમયથી પોતાની ધરપકડથી બચવા માટે સતત નાસતો ફરતો હતો. પોલીસે તેની હિલચાલ અંગે સતત નજર રાખી હતી અને વિવિધ સ્તરે માહિતી એકત્રિત કરવામાં આવી રહી હતી.

નાઈટ પેટ્રોલિંગ દરમિયાન પોલીસને મળેલી વિશ્વસનીય ખાનગી બાતમીના આધારે, સર્વેલન્સ ટીમે તાત્કાલિક કાર્યવાહી કરી આરોપીને શોધી કાઢ્યો હતો. પોલીસે તેને કાયદેસરની પ્રક્રિયા પૂર્ણ કરીને કોર્ટના સજા વોરંટ મુજબ ધરપકડ કરી જેલ હવાલે કર્યો છે. પકડાયેલ આરોપીની ઓળખ સંજયભાઈ મસાભાઈ ભરવાડ (ઉંમર 24), રહેવાસી ભરવાડવાસ, ગામ હરિપર, તાલુકો ભુજ તરીકે થઈ છે.

આ સમગ્ર કામગીરી પોલીસ ઇન્સ્પેક્ટર એ. એમ. હેરમાના માર્ગદર્શન હેઠળ એએસઆઈ દિલીપસિંહ ભરતસિંહ સિંધવ, પોલીસ હેડ કોન્સ્ટેબલ ભરતભાઈ કે. માજીરાણા, નરેન્દ્રસિંહ પી. જાડેજા તેમજ પ્રકાશભાઈ સવશીજી ઠાકોરની ટીમે સંકલિત પ્રયાસોથી સફળતાપૂર્વક પાર પાડી હતી. આ કામગીરીથી ફરી એકવાર સ્પષ્ટ થયું છે કે, કોર્ટના આદેશોની અવગણના કરી લાંબા સમય સુધી ફરાર રહેતા આરોપીઓ પણ કાયદાની પકડથી બચી શકતા નથી.

---------------

હિન્દુસ્થાન સમાચાર / Rohit Ramjibhai Padhiyar