વડોદરા , 14 જુલાઈ (હિ.સ.) વડોદરાના વાઘોડિયા રોડ વિસ્તારમાં પોલીસ જમાદાર પર હુમલાના મામલે હવે નવો વળાંક આવ્યો છે. પોલીસના જણાવ્યા મુજબ ઘટનાના અનુસંધાને કેટલાક લોકો પોલીસ સ્ટેશનમાં ઘૂસી હોબાળો મચાવ્યો, પોલીસની ફરજમાં અવરોધ ઉભો કર્યો અને પોલીસકર્મીઓને ધમકી આપી હતી. સમગ્ર મામલે પોલીસે કુલ આઠ લોકો સામે ગુનો નોંધ્યો છે.

વાઘોડિયા રોડ વિસ્તારમાં પોલીસ જમાદાર પર થયેલા હુમલાની ઘટનાની તપાસ દરમિયાન વધુ વિગતો સામે આવી છે.

પોલીસના જણાવ્યા મુજબ, ઘટનાના અનુસંધાને કેટલાક લોકો પોલીસ સ્ટેશનમાં ધસી આવ્યા હતા અને હોબાળો મચાવી પોલીસની કામગીરીમાં અવરોધ ઉભો કર્યો હતો. સાથે જ પોલીસકર્મીઓને ધમકી આપવામાં આવી હોવાનો પણ આક્ષેપ કરવામાં આવ્યો છે.

આ ઉપરાંત, એક આરોપીએ સોશિયલ મીડિયા પર વીડિયો પોસ્ટ કરીને પોલીસ સામે વિવિધ આક્ષેપો કર્યા હોવાનું પણ પોલીસ દ્વારા જણાવાયું છે.

આ સમગ્ર મામલે પોલીસે રુદ્ર શાહ, જય વ્યાસ, જયમિત જોશી, હિતેશ જોશી, હિતેશ પંચાલ, ભૂમિ પંચાલ, કરણ જસવાણી અને ડિમ્પલ વાઘરી સહિત કુલ 8 આરોપીઓ સામે વિવિધ કલમો હેઠળ ગુનો નોંધ્યો છે.

પોલીસના જણાવ્યા મુજબ, ઝડપાયેલા બે આરોપીઓ દારૂના નશામાં હોવાનું સામે આવતા તેમની સામે પ્રોહિબિશન એક્ટ હેઠળ પણ અલગથી કાર્યવાહી કરવામાં આવી છે.

હાલ સમગ્ર ઘટનાના તમામ પાસાઓની તપાસ ચાલી રહી છે અને પોલીસે જણાવ્યું છે કે પુરાવાના આધારે આગળની કાયદેસરની કાર્યવાહી કરવામાં આવશે.

આ કેસમાં પોલીસ દ્વારા ગંભીર આક્ષેપો કરવામાં આવ્યા છે. બીજી તરફ, આરોપીઓના પક્ષનો પ્રતિભાવ હજુ જાહેર થયો નથી. સમગ્ર મામલો તપાસ હેઠળ હોવાથી હવે પોલીસની આગળની કાર્યવાહી અને તપાસના તારણો પર સૌની નજર ટકેલી છે.

---------------

હિન્દુસ્થાન સમાચાર / અમિત શાહ