વડોદરા ,14 જુલાઈ (હિ.સ.) વડોદરા જિલ્લાના પાદરા તાલુકાના સાગમા વિસ્તારની કેનાલમાંથી મહિલાનો મૃતદેહ મળી આવવાના ચકચારી કેસમાં પોલીસને મહત્વની સફળતા મળી છે. પાદરા પોલીસ અને જિલ્લા એલસીબીએ હત્યાના ગુનાનો ભેદ ઉકેલી આરોપીની ધરપકડ કરી છે. પોલીસના જણાવ્યા મુજબ, પ્રેમ સંબંધમાં થયેલો વિવાદ આ હત્યાનું કારણ બન્યો હતો.

વડોદરા જિલ્લાના પાદરા તાલુકાના સાગમા વિસ્તારમાં કેનાલમાંથી મહિલાનો મૃતદેહ મળી આવતાં સમગ્ર જિલ્લામાં ચકચાર મચી ગઈ હતી. આ ગંભીર કેસમાં પાદરા પોલીસ અને જિલ્લા એલસીબીની સંયુક્ત તપાસ બાદ હત્યાના ગુનાનો ભેદ ઉકેલવામાં સફળતા મળી છે.

પોલીસના જણાવ્યા મુજબ, મૃતકની ઓળખ પાર્વતી તરીકે થઈ છે, જે વડોદરાની એસ.એસ.જી. હોસ્પિટલમાં સફાઈ કર્મચારી તરીકે ફરજ બજાવતી હતી. જ્યારે આરોપી મહેશ ગણપત ચૌહાણ એ જ હોસ્પિટલમાં સિક્યુરિટી ગાર્ડ તરીકે કામ કરતો હતો.

તપાસમાં સામે આવ્યું છે કે બંને વચ્ચે છેલ્લા કેટલાક સમયથી પ્રેમ સંબંધ હતો. ઘટનાના દિવસે આરોપી પાર્વતીને પોતાની સાથે પાદરા તરફ લઈ ગયો હતો. આ દરમિયાન બંને વચ્ચે સાથે રહેવાના મુદ્દે ઉગ્ર બોલાચાલી થઈ હતી.

પોલીસના જણાવ્યા અનુસાર, પાર્વતી આરોપી સાથે રહેવાની ઇચ્છા વ્યક્ત કરી રહી હતી, પરંતુ મહેશ તેના માટે તૈયાર ન હતો. વિવાદ વધતા આરોપી આવેશમાં આવી ગયો અને કેનાલ નજીક પાર્વતીની હત્યા કરી દીધી હતી.હત્યા બાદ ગુનાના પુરાવા છુપાવવાના ઇરાદે આરોપીએ મૃતદેહને કેનાલમાં ફેંકી દીધો હતો.

પાદરા પોલીસે ટેક્નિકલ સર્વેલન્સ અને માનવ ગુપ્ત માહિતીના આધારે તપાસ આગળ વધારી આરોપી સુધી પહોંચી તેની ધરપકડ કરી છે. હાલ આરોપી સામે સંબંધિત કાયદાકીય કલમો હેઠળ કાર્યવાહી કરવામાં આવી રહી છે અને સમગ્ર ઘટનાની વધુ તપાસ ચાલુ છે.

આ કેસમાં પોલીસે ઝડપી તપાસ કરીને હત્યાના ગુનાનો ભેદ ઉકેલ્યો છે. હવે આગળની તપાસમાં અન્ય કોઈ પાસાં સામે આવે છે કે નહીં અને કોર્ટમાં શું પુરાવા રજૂ થાય છે તેના પર સૌની નજર રહેશે.

હિન્દુસ્થાન સમાચાર / અમિત શાહ