અમરેલી, 15 જુલાઈ (હિ.સ.) : અમરેલી જિલ્લામાં શરીર સંબંધી ગંભીર ગુનાઓમાં સંડોવાયેલા આરોપી મહેશ ધાખડા સામે અમરેલી જિલ્લા પોલીસ દ્વારા કડક કાર્યવાહી કરવામાં આવી છે. જિલ્લા પોલીસ વડાના માર્ગદર્શન હેઠળ અમરેલી એલસીબી (લોકલ ક્રાઇમ બ્રાન્ચ)ની ટીમે આરોપી સામે પાસા (PASA) હેઠળ કાર્યવાહી કરીને તેને સુરત મધ્યસ્થ જેલ ખાતે મોકલી આપ્યો છે.

પોલીસના જણાવ્યા મુજબ, મહેશ ધાખડા સામે શરીર સંબંધી અનેક ગુનાઓ નોંધાયેલા છે. તેની સતત ગુનાહિત પ્રવૃત્તિઓને કારણે કાયદો અને વ્યવસ્થાની સ્થિતિ પર પ્રતિકૂળ અસર પડતી હોવાનું ધ્યાનમાં આવતા તેની સામે ગુજરાત અસામાજિક પ્રવૃત્તિઓ નિવારણ અધિનિયમ (PASA) હેઠળ દરખાસ્ત કરવામાં આવી હતી.

સત્તાવાળાઓની મંજૂરી મળ્યા બાદ અમરેલી એલસીબીની ટીમે આરોપીને કસ્ટડીમાં લઈ પાસાના હુકમનો અમલ કરાવ્યો અને સુરત મધ્યસ્થ જેલ ખાતે મોકલી આપ્યો હતો.

જિલ્લા પોલીસ દ્વારા અસામાજિક તત્વો અને ગુનાહિત પ્રવૃત્તિઓમાં સંડોવાયેલા આરોપીઓ સામે સતત કડક કાર્યવાહી કરવામાં આવી રહી છે. પોલીસે સ્પષ્ટ કર્યું છે કે જાહેર શાંતિ અને કાયદો-વ્યવસ્થા જાળવવા માટે આવી કાર્યવાહી આગામી સમયમાં પણ યથાવત રાખવામાં આવશે.

---------------

હિન્દુસ્થાન સમાચાર / Gondaliya Abhishek Nandrambhai