અમરેલી, 15 જુલાઈ (હિ.સ.) : અમરેલી જિલ્લાના જાફરાબાદ તાલુકાના લોર ગામે વન વિભાગ દ્વારા વન્યજીવ સંરક્ષણ અને માનવ-વન્યજીવ સહઅસ્તિત્વ અંગે જનજાગૃતિ કાર્યક્રમનું આયોજન કરવામાં આવ્યું હતું. કાર્યક્રમમાં વન વિભાગના અધિકારીઓ, સ્થાનિક આગેવાનો, ગ્રામજનો અને વિદ્યાર્થીઓ મોટી સંખ્યામાં ઉપસ્થિત રહ્યા હતા.

કાર્યક્રમ દરમિયાન વન વિભાગના અધિકારીઓએ વન્યજીવોના સંરક્ષણનું મહત્વ સમજાવતાં જણાવ્યું કે જંગલ અને વન્યજીવો કુદરતી પર્યાવરણનો મહત્વપૂર્ણ ભાગ છે. વન્યજીવોને કોઈપણ પ્રકારની હેરાનગતિ ન પહોંચાડવી, તેમના રહેણાંક વિસ્તારનું રક્ષણ કરવું તેમજ જંગલ વિસ્તારમાં સાવચેતી રાખવી દરેક નાગરિકની જવાબદારી છે.

અધિકારીઓએ ગ્રામજનોને સિંહ સહિત અન્ય વન્યજીવો ગામ કે ખેતર વિસ્તારમાં દેખાય તો ગભરાવાના બદલે તાત્કાલિક વન વિભાગને જાણ કરવાની અપીલ કરી હતી. સાથે જ વન્યજીવ સંરક્ષણ સંબંધિત કાયદાઓ અને નિયમોની પણ માહિતી આપવામાં આવી હતી.

કાર્યક્રમના અંતે ગ્રામજનોએ વન્યજીવોના સંરક્ષણ માટે સહયોગ આપવાની પ્રતિબદ્ધતા વ્યક્ત કરી હતી. વન વિભાગે જણાવ્યું હતું કે આવા જનજાગૃતિ કાર્યક્રમો દ્વારા લોકોમાં જાગૃતિ વધે છે અને માનવ-વન્યજીવ સંઘર્ષ ઘટાડવામાં મદદ મળે છે.

---------------

હિન્દુસ્થાન સમાચાર / Gondaliya Abhishek Nandrambhai