કચ્છ, 22 જુલાઈ (હિ.સ.) : પશ્ચિમ કચ્છ જિલ્લામાં ગેરકાયદે ખનીજ ખનન અને ખનીજ ચોરીને કાબૂમાં લેવા માટે પોલીસ દ્વારા સતત દેખરેખ અને કાર્યવાહી હાથ ધરવામાં આવી રહી છે. પોલીસ મહાનિરીક્ષક, સરહદી રેન્જ ભુજ તથા પશ્ચિમ કચ્છના પોલીસ અધિક્ષકના માર્ગદર્શન હેઠળ લોકલ ક્રાઇમ બ્રાન્ચ (LCB)ની ટીમે વધુ એક અસરકારક કાર્યવાહી કરતાં ખાવડા વિસ્તારમાંથી ગેરરીતિથી પરિવહન કરવામાં આવી રહેલી સાદી રેતીનો અંદાજે 4 ટન જેટલો જથ્થો ઝડપી પાડ્યો છે.

મળતી માહિતી અનુસાર, આર.ઈ. પાર્ક વિસ્તાર તરફ પેટ્રોલિંગ અને બાતમીના આધારે એલસીબીની ટીમે શંકાસ્પદ ટ્રકને અટકાવી તેની તપાસ હાથ ધરી હતી. તપાસ દરમિયાન ટ્રકમાં સાદી રેતી ભરેલી હોવાનું સામે આવ્યું હતું. વાહનચાલક પાસે જરૂરી દસ્તાવેજો અને ખનીજના કાયદેસર પરિવહન અંગે સંતોષકારક પુરાવા રજૂ ન કરી શકતા પોલીસ દ્વારા ટ્રકને તાત્કાલિક ડિટેઇન કરવામાં આવ્યો હતો.

પોલીસે ટ્રક સહિતનો મુદ્દામાલ કબ્જે કરીને સમગ્ર મામલો ખાણ અને ખનીજ વિભાગને સોંપ્યો છે. હવે સંબંધિત વિભાગ દ્વારા ખનિજ નિયમોના ભંગ, પરવાનગી તેમજ અન્ય કાનૂની મુદ્દાઓની તપાસ કરીને આગળની કાર્યવાહી હાથ ધરવામાં આવશે. આ કાર્યવાહીથી ગેરકાયદે ખનીજ પરિવહન કરતા તત્વોમાં ફફડાટ ફેલાયો હોવાનું માનવામાં આવે છે.

કચ્છ જેવા વિશાળ વિસ્તારમાં ખનીજ સંપત્તિના ગેરકાયદે ખનન અને પરિવહનને રોકવા માટે પોલીસ અને ખાણ-ખનીજ વિભાગ વચ્ચે સંકલન સાથે કામગીરી ચાલી રહી છે. નિયમિત પેટ્રોલિંગ, બાતમીદારોના નેટવર્ક અને ચેકિંગ અભિયાનના કારણે આવા કિસ્સાઓ સામે આવી રહ્યા છે, જેના પરિણામે કુદરતી સંપત્તિના ગેરઉપયોગને રોકવામાં મદદ મળી રહી છે.

પોલીસનું કહેવું છે કે જિલ્લામાં ગેરકાયદે ખનીજ ખનન અને પરિવહન સામે આવનારા સમયમાં પણ વધુ સઘન દેખરેખ રાખી કડક કાર્યવાહી ચાલુ રહેશે, જેથી કુદરતી સંપત્તિનું સંરક્ષણ થાય અને કાયદાનો ભંગ કરનારાઓ સામે કડક સંદેશ પહોંચે.

---------------

હિન્દુસ્થાન સમાચાર / Rohit Ramjibhai Padhiyar