મહેસાણા, 22 જુલાઈ (હિ.સ.) ભારતીય જનતા પાર્ટી કડી શહેર મંડળની બેઠક મંગળવારે યોજાઈ હતી. બેઠકમાં આગામી સંગઠનાત્મક કાર્યક્રમોની રૂપરેખા, સંગઠનને વધુ મજબૂત બનાવવા માટેની કામગીરી તેમજ કાર્યકરોની જવાબદારીઓ અંગે ચર્ચા કરવામાં આવી હતી.

બેઠકમાં ઝોન પ્રભારી તરીકે ઉપસ્થિત રહેલા મહેસાણા જિલ્લા ભાજપના મહામંત્રી ભગાજી ટી. ઠાકોરે કાર્યકરોને સંગઠનની આગામી પ્રવૃત્તિઓ અંગે માર્ગદર્શન આપ્યું હતું. તેમણે પક્ષના વિવિધ કાર્યક્રમોને સફળ બનાવવા માટે કાર્યકરોને સક્રિય રીતે જોડાવા તેમજ સંગઠનની વિચારધારાને જનજન સુધી પહોંચાડવા માટે આયોજનબદ્ધ રીતે કાર્ય કરવાની અપીલ કરી હતી.

બેઠક દરમિયાન સંગઠનના વિવિધ કાર્યક્રમોના અસરકારક અમલીકરણ, કાર્યકરો વચ્ચે સંકલન વધારવા તેમજ આગામી દિવસોમાં યોજાનારા કાર્યક્રમોની તૈયારીઓ અંગે વિસ્તૃત ચર્ચા કરવામાં આવી હતી. કાર્યકરોને સંગઠન દ્વારા સોંપવામાં આવેલી જવાબદારીઓ નિષ્ઠાપૂર્વક નિભાવવા અને જનસંપર્ક વધારવા માટે પણ સૂચનો આપવામાં આવ્યા હતા.

કડી શહેર ભાજપ મંડળની આ બેઠકમાં સંગઠનના હોદ્દેદારો અને કાર્યકરો ઉપસ્થિત રહ્યા હતા. બેઠકમાં આગામી કાર્યક્રમોને સફળ બનાવવા માટે સૌએ સંકલિત પ્રયાસો કરવાની પ્રતિબદ્ધતા વ્યક્ત કરી હતી.

હિન્દુસ્થાન સમાચાર / RINKU AMITKUMAR THAKOR