કચ્છ, 24 જુલાઈ (હિ.સ.) : પશ્ચિમ કચ્છ જિલ્લામાં મિલકત સંબંધિત ગુનાઓ પર અસરકારક નિયંત્રણ લાવવા માટે પોલીસ દ્વારા સતત દેખરેખ અને ગુપ્ત માહિતીના આધારે કામગીરી હાથ ધરવામાં આવી રહી છે. આવી જ એક સફળ કાર્યવાહીમાં લોકલ ક્રાઈમ બ્રાન્ચ (એલસીબી) પશ્ચિમ કચ્છ, ભુજે જખૌ પોલીસ સ્ટેશન વિસ્તારમાં બનેલી કોપર વાયર ચોરીની ઘટનાનો ભેદ ઉકેલી વણશોધાયેલ ગુનાનો સફળતાપૂર્વક પર્દાફાશ કર્યો છે. પોલીસે આરોપીની ધરપકડ કરીને ચોરીમાં ગયેલો મુદ્દામાલ તેમજ ગુનામાં ઉપયોગમાં લેવાયેલ વાહન પણ કબજે કર્યું છે.
પોલીસને મળેલી ચોક્કસ બાતમી અને ટેકનિકલ તપાસના આધારે શંકાસ્પદ વ્યક્તિ સુધી પહોંચવામાં સફળતા મળી હતી. તપાસ દરમિયાન કુલદીપસિંહ વખુભા જાડેજા (ઉંમર ૨૯ વર્ષ), રહે. વાકું, તાલુકો અબડાસા, જે ખેતીનો વ્યવસાય કરે છે, તેની સંડોવણી સામે આવતા તેને કાયદેસરની કાર્યવાહી હેઠળ ઝડપી લેવામાં આવ્યો હતો. પૂછપરછ દરમિયાન મળેલી માહિતી અને પુરાવાના આધારે જખૌ પોલીસ સ્ટેશનમાં નોંધાયેલા એ-પાર્ટ ગુનો રજિસ્ટર નંબર ૩૦/૨૬નો ભેદ ઉકેલવામાં આવ્યો હોવાનું પોલીસે જણાવ્યું છે. આ ગુનો ભારતીય ન્યાય સંહિતા-૨૦૨૩ની કલમ ૩૦૫(એ), ૩૩૧(૩) અને ૩૩૧(૪) હેઠળ નોંધાયેલ છે.
કાર્યવાહી દરમિયાન આરોપીના કબજામાંથી અંદાજે ૭૦ કિલોગ્રામ વજનના કોપરના વાયરના ગુચડા, જેની અંદાજિત કિંમત રૂપિયા ૩૫ હજાર થાય છે, તે કબજે કરવામાં આવ્યા હતા. ઉપરાંત ગુનામાં ઉપયોગમાં લેવાયેલી બ્રેઝા કાર (રજિસ્ટ્રેશન નંબર GJ-12-DS-0631), જેની અંદાજિત કિંમત રૂપિયા ૪ લાખ છે, તે પણ પોલીસે જપ્ત કરી છે. આમ કુલ નોંધપાત્ર કિંમતનો મુદ્દામાલ કબજે કરીને પોલીસને તપાસમાં મહત્વની સફળતા મળી છે.
આ સમગ્ર કામગીરી લોકલ ક્રાઈમ બ્રાન્ચ પશ્ચિમ કચ્છ ભુજની ટીમે સુનિયોજિત આયોજન અને સતત દેખરેખના પરિણામે પાર પાડી હતી. કાર્યવાહીમાં એએસઆઈ નિલેશભાઈ ભટ્ટ, પ્રધ્યુમનસિંહ ગોહિલ તેમજ હેડ કોન્સ્ટેબલ નવીનભાઈ જોષી, શક્તિસિંહ ગઢવી, રાજદીપસિંહ ગોહિલ અને જીવરાજભાઈ ગઢવીએ મહત્વપૂર્ણ ભૂમિકા ભજવી હતી. પોલીસે આરોપી સામે વધુ કાયદેસરની કાર્યવાહી હાથ ધરી છે અને ગુનાની વધુ કડીઓ જાણવા માટે તપાસ આગળ વધારી છે.
---------------
હિન્દુસ્થાન સમાચાર / Rohit Ramjibhai Padhiyar
