કચ્છ, 25 જુલાઈ (હિ.સ.) : કચ્છ જિલ્લાના ચુબડક ગામે વીજ માળખાકીય સુવિધાઓને વધુ મજબૂત બનાવતી મહત્વપૂર્ણ પહેલના ભાગરૂપે રૂ. 11.22 કરોડના ખર્ચે નિર્માણ પામનારા 66 કે.વી. સબ સ્ટેશનનું ભૂમિપૂજન રાજ્યમંત્રી ત્રિકમભાઈ છાંગાના હસ્તે કરવામાં આવ્યું હતું. આ પ્રોજેક્ટ પૂર્ણ થયા બાદ ચુબડક સહિત આસપાસના ચાર ગામોના રહેવાસીઓ, ખેડૂતો તેમજ ઔદ્યોગિક એકમોને વધુ ગુણવત્તાસભર અને અવિરત વીજ પુરવઠાનો લાભ મળશે તેવી આશા વ્યક્ત કરવામાં આવી હતી.

કાર્યક્રમને સંબોધતા રાજ્યમંત્રી ત્રિકમભાઈ છાંગાએ જણાવ્યું હતું કે રાજ્ય સરકારનો મુખ્ય ધ્યેય દરેક નાગરિક સુધી પૂરતી અને વિશ્વસનીય વીજળી પહોંચાડવાનો છે. આ દિશામાં છેલ્લા કેટલાક વર્ષોમાં રાજ્યભરમાં નવા સબ સ્ટેશનોનું નિર્માણ કરવામાં આવ્યું છે અને વીજ વ્યવસ્થાને આધુનિક બનાવવા સતત કામગીરી હાથ ધરાઈ રહી છે. તેમણે જણાવ્યું કે નવા સબ સ્ટેશનના અમલથી વીજ દબાણમાં સુધારો થશે, ફીડરોની લંબાઈમાં ઘટાડો થતાં ટેક્નિકલ લોસ પણ ઓછો થશે અને ખેતી તેમજ ઘરેલુ ગ્રાહકોને વિક્ષેપરહિત વીજ સેવા ઉપલબ્ધ બનશે.

તેમણે વધુમાં જણાવ્યું કે આ પ્રોજેક્ટના કારણે આશરે 1,100 જેટલા ગ્રાહકોને ગુણવત્તાસભર વીજ પુરવઠાનો સીધો લાભ મળશે. સાથે જ ભવિષ્યમાં નવા વીજ જોડાણો આપવા પણ સરળતા રહેશે. ખેડૂતોને કિસાન સૂર્યોદય યોજના હેઠળ મળતી સુવિધાઓનો ઉલ્લેખ કરતાં તેમણે કહ્યું કે કૃષિ ક્ષેત્રને વધુ સશક્ત બનાવવા રાજ્ય સરકાર સતત પ્રયાસશીલ છે અને ગ્રામ્ય વિકાસને પ્રાથમિકતા આપવામાં આવી રહી છે.

પ્રસંગ દરમિયાન તેમણે કચ્છ જિલ્લામાં માર્ગ, શિક્ષણ, આરોગ્ય, ખેતી અને વીજ ક્ષેત્રે થયેલા વિકાસકાર્યોની માહિતી આપી હતી તેમજ વિકાસયાત્રામાં જનસહભાગિતાનું મહત્વ પણ સમજાવ્યું હતું.

કાર્યક્રમની શરૂઆત અંજાર વર્તુળ કચેરીના અધિક્ષક ઇજનેર પી.આર. પટેલના સ્વાગત પ્રવચનથી થઈ હતી, જ્યારે આભારવિધિ પીજીવીસીએલના અધિક્ષક ઇજનેર જે.સી. ગોસ્વામીએ વ્યક્ત કરી હતી. સમારોહમાં સ્થાનિક સ્વરાજ્ય સંસ્થાના પદાધિકારીઓ, વિવિધ ગામોના સરપંચો, જનપ્રતિનિધિઓ, આગેવાનો તેમજ પીજીવીસીએલના ઉચ્ચ અધિકારીઓ મોટી સંખ્યામાં ઉપસ્થિત રહ્યા હતા. નવા સબ સ્ટેશનથી સમગ્ર વિસ્તારના વીજ માળખાને વધુ મજબૂત આધાર મળશે અને વિકાસને નવી ગતિ મળશે તેવી આશા વ્યક્ત કરવામાં આવી હતી.

---------------

હિન્દુસ્થાન સમાચાર / Rohit Ramjibhai Padhiyar