કચ્છ, 26 જુલાઈ (હિ.સ.) : દારૂના ગેરકાયદે ધંધા સામે એલસીબીનો કડક પ્રહાર: માંડવીના બુટલેગરને PASA હેઠળ અમદાવાદ જેલમાં ધકેલાયો

પશ્ચિમ કચ્છ જિલ્લામાં ગેરકાયદેસર દારૂના વેપાર અને અસામાજિક પ્રવૃત્તિઓ સામે પોલીસ દ્વારા સતત કડક કાર્યવાહી હાથ ધરવામાં આવી રહી છે. આ અભિયાનને વધુ વેગ આપતા પશ્ચિમ કચ્છ લોકલ ક્રાઇમ બ્રાન્ચ (LCB)એ માંડવી વિસ્તારમાં ભારતીય બનાવટના વિદેશી દારૂના ગેરકાયદેસર વેચાણ સાથે સંકળાયેલા એક કુખ્યાત ઇસમને ગુજરાત અસામાજિક પ્રવૃત્તિ નિવારણ અધિનિયમ (PASA) હેઠળ અટકાયત કરીને મધ્યસ્થ જેલ, અમદાવાદ ખાતે મોકલી આપ્યો છે.

પોલીસ દ્વારા મળતી માહિતી મુજબ દેવરાજ ગોપાલ ગઢવી, રહે. કલવાણ રોડ, માંડવી-કચ્છ, લાંબા સમયથી દારૂના ગેરકાયદેસર ધંધા સાથે સંકળાયેલો હોવાનું સામે આવ્યું હતું. તેની પ્રવૃત્તિઓને કારણે વિસ્તારમાં કાયદો અને વ્યવસ્થા પર પ્રતિકૂળ અસર થતી હોવાની સાથે સમાજમાં અસુરક્ષાની લાગણી પણ ઉભી થઈ રહી હતી. તેના વિરુદ્ધ અગાઉ નોંધાયેલા ગુનાઓ અને ઉપલબ્ધ પુરાવાના આધારે પોલીસે તેની સામે પાસા હેઠળ કાર્યવાહી કરવાની દરખાસ્ત તૈયાર કરી હતી.

સંબંધિત સત્તાધિકારી દ્વારા આ દરખાસ્તને મંજૂરી મળ્યા બાદ આરોપીની અટકાયત કરવામાં આવી હતી. જરૂરી કાનૂની પ્રક્રિયા પૂર્ણ કર્યા બાદ દેવરાજ ગઢવીને મધ્યસ્થ જેલ, અમદાવાદ ખાતે ખસેડવામાં આવ્યો હતો. પોલીસનું માનવું છે કે આવી કડક કાર્યવાહીથી ગેરકાયદેસર દારૂના વેપારમાં સંકળાયેલા અન્ય તત્વોમાં પણ કાયદાનો ભય ઉભો થશે અને જિલ્લામાં અસામાજિક પ્રવૃત્તિઓ પર નિયંત્રણ લાવવામાં મદદ મળશે.

આ સમગ્ર કાર્યવાહી પશ્ચિમ કચ્છ એલસીબીના પોલીસ ઇન્સ્પેક્ટર એ. એમ. મકવાણાના માર્ગદર્શન હેઠળ સફળતાપૂર્વક પાર પાડવામાં આવી હતી. કામગીરીમાં એએસઆઈ મયુરસિંહ રાણા તેમજ હેડ કોન્સ્ટેબલ મુળરાજભાઈ ગઢવી, લીલાભાઈ દેસાઈ, રાજેશભાઈ ગઢવી અને પોલીસ કોન્સ્ટેબલ પરબતભાઈ ચૌધરીએ મહત્વપૂર્ણ ભૂમિકા ભજવી હતી.

પશ્ચિમ કચ્છ પોલીસ દ્વારા સ્પષ્ટ સંદેશ આપવામાં આવ્યો છે કે જિલ્લામાં ગેરકાયદેસર દારૂના વેપાર, બુટલેગિંગ અને અન્ય અસામાજિક પ્રવૃત્તિઓમાં સંડોવાયેલા તત્વો સામે ભવિષ્યમાં પણ આવી જ કડક અને કાયદેસરની કાર્યવાહી સતત ચાલુ રહેશે. કાયદો અને વ્યવસ્થા જાળવી રાખવા તેમજ સામાન્ય નાગરિકોને સુરક્ષિત વાતાવરણ પૂરું પાડવા પોલીસ તંત્ર સંપૂર્ણ પ્રતિબદ્ધ હોવાનું પણ જણાવાયું છે.

---------------

હિન્દુસ્થાન સમાચાર / Rohit Ramjibhai Padhiyar