મહેસાણા, 27 જુલાઈ (હિ.સ.) : મહેસાણા જિલ્લાના બહુચરાજી તાલુકામાં છેલ્લા કેટલાક દિવસોથી વરસી રહેલા ભારે વરસાદના કારણે ખેડૂતોની ચિંતા વધી છે. સતત વરસાદને કારણે અનેક ખેતરોમાં પાણી ભરાઈ જતાં ઉભા પાકને ભારે નુકસાન થવાની ભીતિ સેવાઈ રહી છે. નીચાણવાળા વિસ્તારોમાં પાણીના નિકાલનો અભાવ હોવાથી પાક લાંબા સમય સુધી પાણીમાં ગરકાવ રહ્યો છે.

ખેડૂતોના જણાવ્યા મુજબ કપાસ, એરંડા, બાજરી, મકાઈ, શાકભાજી અને અન્ય મોસમી પાકોને સૌથી વધુ અસર પહોંચી છે. કેટલાક વિસ્તારોમાં વરસાદી પાણીના પ્રવાહ સાથે જમીનની ફળદ્રુપ માટી પણ ધોવાઈ જતાં નુકસાન વધુ વધ્યું છે. ખેતરોમાં પાણી ભરાયેલા હોવાથી ખેતીના અન્ય કામો પણ અટકી પડ્યા છે.

ખેડૂતોએ સરકાર અને કૃષિ વિભાગને અસરગ્રસ્ત વિસ્તારોનું તાત્કાલિક સર્વેક્ષણ કરીને નુકસાનનું મૂલ્યાંકન કરવાની માંગ કરી છે. સાથે જ પાક નુકસાનીના વળતર અને જરૂરી સહાય વહેલી તકે આપવામાં આવે તેવી અપેક્ષા વ્યક્ત કરી છે.

કૃષિ વિભાગ દ્વારા ખેડૂતોને વરસાદ બાદ ખેતરોમાંથી પાણીના નિકાલની વ્યવસ્થા કરવા તેમજ પાકમાં રોગચાળો ન ફેલાય તે માટે જરૂરી તકેદારી રાખવાની સલાહ આપવામાં આવી છે. જો આગામી દિવસોમાં પણ વરસાદ યથાવત રહેશે તો નુકસાનનું પ્રમાણ વધુ વધી શકે તેવી ખેડૂતોમાં ચિંતા જોવા મળી રહી છે.

---------------

હિન્દુસ્થાન સમાચાર / RINKU AMITKUMAR THAKOR