ભાવનગર, 30 જુલાઈ (હિ.સ.) ભાવનગર પ્રાદેશિક વાહન વ્યવહાર કચેરી (આર.ટી.ઓ.) દ્વારા પ્રાઈવેટ દ્વિચક્રી મોટર વાહનો (મોટરસાયકલ અને સ્કૂટર) માટે નવી ફેન્સી નંબર સીરીઝ GJ-04-FH 0001 થી 9999 માટે ઈ-ઓક્શન યોજવાની જાહેરાત કરવામાં આવી છે. આ ઈ-ઓક્શનમાં રસ ધરાવતા વાહન માલિકો તા. 3 ઓગસ્ટથી 5 ઓગસ્ટ, 2026 દરમિયાન ઓનલાઈન અરજી કરી શકશે. જ્યારે 5 ઓગસ્ટથી 7 ઓગસ્ટ, 2026ના સાંજે 4:00 વાગ્યા સુધી ઓનલાઈન બિડિંગ પ્રક્રિયા ચાલુ રહેશે.

આર.ટી.ઓ. દ્વારા જણાવાયું છે કે અરજદારોએ વાહન પોર્ટલ પર નોંધણી કરી યુઝર આઈડી અને પાસવર્ડ બનાવી ઈ-ઓક્શનમાં ભાગ લેવો રહેશે. બિડિંગ પૂર્ણ થયા બાદ સફળ અરજદારે નિયત સમયમર્યાદામાં જરૂરી ચૂકવણી કરવાની રહેશે. વાહન ખરીદી બાદ 7 દિવસની અંદર ઓનલાઈન CNA ફોર્મ ભરવું ફરજિયાત રહેશે, જ્યારે હરાજીમાં સફળ થયેલા અરજદારે 5 દિવસની અંદર સંપૂર્ણ રકમ જમા કરાવવી પડશે. સમયસર રકમ ન ભરાય તો ભરેલી બેઝ પ્રાઈસ જપ્ત કરવામાં આવશે અને તે નંબરની ફરી હરાજી કરવામાં આવશે.

હરાજીમાં નિષ્ફળ રહેલા અરજદારોને તેમણે જે માધ્યમથી ચુકવણી કરી હશે, તે જ માધ્યમથી એસ.બી.આઈ. ઈ-પે દ્વારા રકમ પરત કરવામાં આવશે. ઈ-ઓક્શનની વિગતવાર પ્રક્રિયા અને શરતો વાહન પોર્ટલ પર ઉપલબ્ધ યુઝર મેન્યુઅલમાં આપવામાં આવી છે.

આ ઈ-ઓક્શન સંબંધિત તમામ બાબતોમાં અંતિમ નિર્ણય લેવાનો અધિકાર ભાવનગરના પ્રાદેશિક વાહન વ્યવહાર અધિકારીને રહેશે. વધુ માહિતી માટે અરજદારોને સત્તાવાર સૂચનાઓનો અભ્યાસ કરવાની અપીલ કરવામાં આવી છે.

હિન્દુસ્થાન સમાચાર / DISHANT NANDRAMBHAI GONADLIYA