ગાંધીનગર,18 ઓગસ્ટ (હિ.સ.) ધોરણ 1 થી 5ની વિદ્યાસહાયક ભરતીમાં OBC (SEBC) ઉમેદવારોને બંધારણીય જોગવાઈ મુજબ સંપૂર્ણ 27% અનામતનો લાભ આપવા તેમજ ભરતી પ્રક્રિયામાં પારદર્શિતા જાળવવા ગાંધીનગરમાં રજૂઆત કરવામાં આવી છે.
18 જૂનના રોજ કરવામાં આવેલી રજૂઆતમાં હાલની 11,000 વિદ્યાસહાયક ભરતીમાં OBC ઉમેદવારોના હક અને અગાઉની ભરતીમાં વંચિત રહેલા લાયક ઉમેદવારોના પ્રશ્નો અંગે તાત્કાલિક ન્યાયસંગત કાર્યવાહી કરવાની માગ કરાઈ છે.
રજૂઆતમાં જણાવાયું છે કે 11,000 વિદ્યાસહાયકની હાલની ભરતીમાં OBC માટે 27% અનામત મુજબની બેઠકો સ્પષ્ટ રીતે જાહેર કરવામાં આવે અને જો એક પણ બેઠક ઓછી ન પડે તે રીતે યોગ્ય પ્રમાણમાં બેઠકો ફાળવવામાં આવે. સાથે જ જિલ્લા આધારિત રોસ્ટર રજિસ્ટર, કેટેગરીવાર જગ્યાઓ અને પસંદગી મેરિટની વિગતો જાહેર કરવાની માગ કરવામાં આવી છે.
ઉમેદવારોનું કહેવું છે કે અગાઉની ભરતીમાં રોસ્ટર, ઓછી જગ્યાઓ અથવા પ્રક્રિયાગત ખામીઓને કારણે કેટલાક લાયક OBC ઉમેદવારો વંચિત રહ્યા હોય તો તેમના કેસની યોગ્ય રીતે સમીક્ષા કરવામાં આવે. અગાઉની ભરતીમાં વંચિત રહેલા લાયક OBC ઉમેદવારોને નિયમ મુજબ ન્યાય મળે તે માટે જરૂરી કાર્યવાહી કરવાની પણ રજૂઆત કરાઈ છે.
રજૂઆતમાં વધુમાં માગ કરાઈ છે કે કોઈ રોસ્ટર ખામી હોય તો વર્તમાન ભરતી પૂર્ણ થાય તે પહેલાં તેનો કાયદેસર અને પારદર્શક નિકાલ કરવામાં આવે. ઉમેદવારોએ જિલ્લા પ્રમાણે રોસ્ટર રજિસ્ટરની ચકાસણી, કેટેગરીવાર જગ્યાઓ તથા મેરિટ સંબંધિત વિગતો જાહેર કરવાની માગ કરી છે.
રજૂઆતમાં આ મુદ્દાને સામાજિક ન્યાય, બંધારણીય અધિકાર અને લાયક ઉમેદવારોના ભવિષ્ય સાથે જોડાયેલો ગણાવી તાત્કાલિક યોગ્ય નિર્ણય લેવા સરકાર અને સંબંધિત તંત્ર સમક્ષ માગ કરવામાં આવી છે.
હિન્દુસ્થાન સમાચાર / હર્ષ શાહ
