કચ્છ, 18 ઓગસ્ટ (હિ.સ.) ભીમ આર્મી દ્વારા ભુજ ખાતે કચ્છ જિલ્લાની સંગઠનાત્મક બેઠકનું આયોજન કરવામાં આવ્યું હતું. બેઠકમાં કચ્છના વિવિધ તાલુકાઓ અને વિસ્તારોમાંથી આગેવાનો તેમજ મોટી સંખ્યામાં કાર્યકર્તાઓ ઉપસ્થિત રહ્યા હતા. બેઠકનો મુખ્ય ઉદ્દેશ સંગઠનના કાર્યને વધુ વ્યાપક બનાવવાની સાથે સમાજના વિવિધ પ્રશ્નો અને હક-અધિકારોને લઈને કાર્યકર્તાઓને એક મંચ પર સંગઠિત કરવાનો રહ્યો હતો.

બેઠક દરમિયાન સંગઠનની આગામી કામગીરી અંગે વિસ્તૃત ચર્ચા કરવામાં આવી હતી. ખાસ કરીને કચ્છના અંતરિયાળ વિસ્તારો સુધી સંગઠનનો વ્યાપ વધારવા, નવા કાર્યકર્તાઓને સંગઠન સાથે જોડવા અને સક્રિય સભ્યોને વિવિધ જવાબદારીઓ સોંપવા અંગે વિચારવિમર્શ થયો હતો. આગેવાનો દ્વારા કાર્યકર્તાઓને માત્ર સંગઠનનો વિસ્તાર કરવા પૂરતું નહીં પરંતુ સમાજના પ્રશ્નોને સમજવા અને જરૂરિયાતના સમયે અસરકારક રીતે અવાજ ઉઠાવવા માટે પણ સક્રિય રહેવા અનુરોધ કરવામાં આવ્યો હતો.

બેઠકમાં આગામી 24 તારીખે યોજાનારા મહા આંદોલનને લઈને વિશેષ ચર્ચા કરવામાં આવી હતી. આ કાર્યક્રમમાં કચ્છમાંથી મોટી સંખ્યામાં લોકો જોડાય અને આંદોલનને વ્યાપક જનસમર્થન મળે તે માટે તાલુકા અને વિસ્તાર કક્ષાએ સંપર્ક તથા જનજાગૃતિની કામગીરી હાથ ધરવા અંગે ભાર મૂકાયો હતો. કાર્યકર્તાઓને સંગઠિત રીતે આયોજન કરી મહા આંદોલનને સફળ બનાવવા માટે સંપૂર્ણ તૈયારી સાથે જોડાવા અપીલ કરવામાં આવી હતી.

આ બેઠક દરમિયાન સમાજના વિવિધ પ્રશ્નો, બંધારણીય અધિકારો, સામાજિક ન્યાય અને લોકોના હિત સાથે જોડાયેલા મુદ્દાઓ અંગે પણ ચર્ચા થઈ હતી. આગેવાનો અને કાર્યકર્તાઓએ સંગઠનની આંતરિક એકતા જાળવીને સમાજના હિત માટે સતત અને લોકશાહી ઢબે કામગીરી કરવાનો સંકલ્પ વ્યક્ત કર્યો હતો.

ભુજ ખાતે યોજાયેલી આ બેઠકને આગામી દિવસોમાં ભીમ આર્મીની સંગઠનાત્મક ગતિવિધિઓને નવી દિશા આપતી મહત્વપૂર્ણ બેઠક તરીકે જોવામાં આવી રહી છે. બેઠકના અંતે 24મીએ યોજાનારા મહા આંદોલનમાં એકજૂથ બની મોટી સંખ્યામાં ઉપસ્થિત રહેવા કાર્યકર્તાઓને અનુરોધ કરવામાં આવ્યો હતો.

હિન્દુસ્થાન સમાચાર / Rohit Ramjibhai Padhiyar