સુરત, 19 ઓગસ્ટ (હિ.સ.) ડુમસ વિસ્તારમાં સ્થાનિક પોલીસની કાર્યવાહી બાદ હવે સુરત ક્રાઈમ બ્રાન્ચે પણ દારૂની હેરાફેરી સામે મોટી કાર્યવાહી કરી છે. ક્રાઈમ બ્રાન્ચે ઉત્તરાખંડ પાસિંગના કન્ટેનર ટ્રકમાંથી ચોરખાનામાં છુપાવેલો રૂ. 6 લાખથી વધુ કિંમતનો વિદેશી દારૂ ઝડપી પાડ્યો છે. આ કાર્યવાહી અંગે સ્થાનિક અહેવાલમાં પણ ટ્રકના ચોરખાનામાંથી લાખો રૂપિયાનો દારૂ ઝડપાયાની માહિતી સામે આવી છે.

ક્રાઈમ બ્રાન્ચને બાતમી મળી હતી કે ઉત્તરાખંડ પાસિંગના કન્ટેનર ટ્રક મારફતે વિદેશી દારૂની હેરાફેરી કરવામાં આવી રહી છે. બાતમીના આધારે ટીમે ડુમસ ગોલ્ડ સાઈડ પાસે નહેરવાળા રસ્તા પર વોચ ગોઠવી ટ્રકને ઝડપી લીધો હતો.પોલીસે ટ્રકની કેબિન તથા છત ઉપર બનાવવામાં આવેલા ખાસ ચોરખાનાની તપાસ કરતા તેમાં ભારતીય બનાવટની વિદેશી દારૂની 288 બોટલ મળી આવી હતી. જપ્ત કરાયેલા દારૂની કિંમત રૂ. 6,00,612 હોવાનું સામે આવ્યું છે.

દારૂ સાથે રૂ. 16.25 લાખનો મુદ્દામાલ જપ્ત

પોલીસે ટ્રક ચાલક તરીકે હરિયાણાના પાણીપતના રહેવાસી 27 વર્ષીય યાદ સત્નારાયણ ભારદ્વાજની ધરપકડ કરી હોવાનું અહેવાલમાં જણાવાયું છે.

ક્રાઈમ બ્રાન્ચે દારૂ ઉપરાંત રૂ. 10 લાખની કિંમતનો કન્ટેનર ટ્રક અને રૂ. 25 હજારનો iPhone પણ કબજે કર્યો છે. આમ કુલ રૂ. 16,25,612નો મુદ્દામાલ કબજે કરી વધુ તપાસ હાથ ધરવામાં આવી છે.

પોલીસ હવે આ દારૂનો જથ્થો ક્યાંથી લાવવામાં આવ્યો હતો, કોને પહોંચાડવાનો હતો અને સમગ્ર હેરાફેરીના નેટવર્કમાં અન્ય કોણ સંડોવાયેલું છે તે દિશામાં તપાસ કરી રહી છે.

ડુમસ વિસ્તારમાં તાજેતરમાં પણ દારૂની મહેફિલો અને દારૂની હેરાફેરી સામે પોલીસ કાર્યવાહી થઈ છે. તાજેતરમાં રાજહંસ બેલીઝા વિસ્તારમાં પોલીસે દારૂની મહેફિલ પર દરોડો પાડી છ કાપડ વેપારીઓને ઝડપી પાડ્યા હતા અને વિદેશી દારૂ સહિત રૂ. 10.07 લાખનો મુદ્દામાલ જપ્ત કર્યો હતો.

હિન્દુસ્થાન સમાચાર / યજુવેન્દ્ર દુબે