કચ્છ, 24 સપ્ટેમ્બર (હિ.સ.) : રાપર તાલુકામાં નોંધાયેલા ગંભીર ગુનાના કેસમાં રાપર પોલીસે ઝડપી કાર્યવાહી હાથ ધરી ગણતરીની કલાકોમાં મુખ્ય આરોપીને ઝડપી પાડ્યો છે. પોલીસની આ કામગીરીમાં ટેકનિકલ એનાલિસિસ અને માનવ સૂત્રોની મદદથી આરોપીનું ચોક્કસ પગેરું મેળવી તેને કાયદેસરની કાર્યવાહી હેઠળ લેવામાં આવ્યો હોવાનું પોલીસ દ્વારા જણાવાયું છે.

મળતી માહિતી મુજબ, તા. 22 સપ્ટેમ્બર 2026ના રોજ રાપર પોલીસ સ્ટેશનમાં ગુનો નોંધાયો હતો. ગુનો નોંધાયા બાદ આરોપીને ઝડપી પાડવા માટે રાપર પોલીસ દ્વારા તાત્કાલિક તપાસ શરૂ કરવામાં આવી હતી.

આ કેસની ગંભીરતાને ધ્યાનમાં રાખીને રાપર પોલીસ સ્ટેશનના પોલીસ ઇન્સ્પેક્ટર આર.એલ. ખટાણાએ આરોપીની શોધખોળ માટે જરૂરી એક્શન પ્લાન તૈયાર કર્યો હતો. તપાસ દરમિયાન પોલીસ ટીમે ટેકનિકલ એનાલિસિસ તેમજ હ્યુમન સોર્સિસનો સહારો લીધો હતો. વિવિધ માહિતી અને તપાસના આધારે પોલીસને આરોપી અંગે મહત્વની કડી મળી હતી.

આ માહિતીના આધારે પોલીસે કાર્યવાહી આગળ ધપાવી રાપર તાલુકાના બાદરગઢ ગામના રહેવાસી 26 વર્ષીય કમલેશ ઉર્ફે કરમણ ભુરાભાઈ રાઠોડ (ભીલ)ને ઝડપી પાડ્યો હતો. આરોપીને ગણતરીની કલાકોમાં ઝડપી લેવામાં આવતા પોલીસની ત્વરિત કાર્યવાહી સામે આવી છે. આરોપીની ધરપકડ બાદ કેસને લગતી આગળની કાયદેસરની કાર્યવાહી હાથ ધરવામાં આવી હોવાનું જાણવા મળ્યું છે.

રાપર પોલીસની આ કામગીરીમાં પોલીસ ઇન્સ્પેક્ટર આર.એલ. ખટાણા, પી.એસ.આઈ. એચ.વી. કાતરીયા સહિત રાપર પોલીસ સ્ટેશનના સ્ટાફે મહત્વની ભૂમિકા ભજવી હતી.

પોલીસના ઉચ્ચ અધિકારીઓ દ્વારા જિલ્લામાં દુષ્કર્મ અને અપહરણ જેવા ગંભીર પ્રકારના ગુનાઓને અટકાવવા તેમજ આવા ગુનાઓમાં સંડોવાયેલા આરોપીઓને ઝડપી પાડવા માટે સતત માર્ગદર્શન અને સૂચનાઓ આપવામાં આવી રહી છે. જેના અનુસંધાને રાપર પોલીસે ગુનો નોંધાયા બાદ ઝડપી તપાસ હાથ ધરી આરોપી સુધી પહોંચવામાં સફળતા મેળવી હોવાનું પોલીસ દ્વારા જણાવાયું છે.

---------------

હિન્દુસ્થાન સમાચાર / Rohit Ramjibhai Padhiyar