કચ્છ, 24 સપ્ટેમ્બર (હિ.સ.) : ભુજ શહેરમાં વાહનચાલકોમાં ટ્રાફિક નિયમો અંગે જાગૃતિ વધારવા અને માર્ગ અકસ્માતો અટકાવવાના હેતુથી પશ્ચિમ કચ્છ-ભુજ જિલ્લા પોલીસ દ્વારા માર્ગ સલામતી રેલીનું આયોજન કરવામાં આવ્યું હતું. શહેરના જયુબીલી ગ્રાઉન્ડ સર્કલ ખાતેથી યોજાયેલી આ રેલી દરમિયાન પોલીસ દ્વારા નાગરિકોને ટ્રાફિક શિસ્ત જાળવવા અને માર્ગ પર જવાબદારીપૂર્વક વાહન ચલાવવા અંગે જાગૃત કરવામાં આવ્યા હતા.

રેલી દરમિયાન ‘લેનમાં રહો, સુરક્ષિત રહો’ જેવા સંદેશ સાથે વાહનચાલકોને પોતાની લેનમાં રહીને વાહન ચલાવવાની અપીલ કરવામાં આવી હતી. રસ્તા પર વાહન ચલાવતી વખતે ઉતાવળ, બેદરકારી અને ટ્રાફિક નિયમોની અવગણના અકસ્માતનું કારણ બની શકે છે, ત્યારે નિયમોનું પાલન કરીને પોતે તેમજ અન્ય લોકોની સુરક્ષા જાળવવાનો સંદેશ આપવામાં આવ્યો હતો.

ખાસ કરીને દ્વિચક્રી વાહનચાલકો માટે હેલમેટના મહત્વ અંગે વિશેષ જાગૃતિ ફેલાવવામાં આવી હતી. વાહન ચલાવતી વખતે હેલમેટનો ઉપયોગ માત્ર કાયદાકીય ફરજ પૂરતો સીમિત ન રાખી તેને વ્યક્તિગત સુરક્ષાના મહત્વપૂર્ણ સાધન તરીકે અપનાવવા માટે લોકોને સમજાવવામાં આવ્યા હતા. અકસ્માતની સ્થિતિમાં હેલમેટ ગંભીર ઈજાના જોખમને ઘટાડવામાં મદદરૂપ બની શકે છે, તેથી દરેક દ્વિચક્રી વાહનચાલકે હેલમેટ પહેરીને જ મુસાફરી કરવી જોઈએ તેવો સંદેશ આપવામાં આવ્યો હતો.

પશ્ચિમ કચ્છ-ભુજ જિલ્લા પોલીસ દ્વારા આયોજિત આ રેલીનો મુખ્ય ઉદ્દેશ્ય ભુજ શહેરમાં ટ્રાફિક વ્યવસ્થા વધુ સુદૃઢ બનાવવા સાથે નાગરિકોમાં માર્ગ સલામતી પ્રત્યે જવાબદારીની ભાવના વિકસાવવાનો રહ્યો હતો. ટ્રાફિક નિયમોનું પાલન, યોગ્ય લેનનો ઉપયોગ અને હેલમેટ સહિતના સુરક્ષા નિયમોને જીવનશૈલીનો ભાગ બનાવવામાં આવે તો માર્ગ અકસ્માતોની સંભાવના ઘટાડવામાં મદદ મળી શકે છે.

રેલીના માધ્યમથી પોલીસ તંત્રએ વાહનચાલકોને સ્પષ્ટ સંદેશ આપ્યો હતો કે માર્ગ સલામતી માત્ર પોલીસની જવાબદારી નથી, પરંતુ દરેક નાગરિકની સહભાગિતાથી જ સુરક્ષિત અને શિસ્તબદ્ધ ટ્રાફિક વ્યવસ્થા શક્ય બને છે. ભુજને વધુ સુરક્ષિત બનાવવા માટે લોકો નિયમોનું પાલન કરે અને અન્ય વાહનચાલકોની સુરક્ષાનું પણ ધ્યાન રાખે તેવી અપીલ કરવામાં આવી હતી.

---------------

હિન્દુસ્થાન સમાચાર / Rohit Ramjibhai Padhiyar