ગીર સોમનાથ, 24 સપ્ટેમ્બર (હિ.સ.) : પશ્ચિમ રેલવેના ભાવનગર મંડળના વેરાવળ રેલવે સ્ટેશન પર RPFની સતર્કતા અને ત્વરિત કાર્યવાહીથી એક મુસાફરનો ચોરાયેલો બેગ, મોબાઇલ ફોન તથા ચાર્જર પરત મેળવવામાં આવ્યા. CCTV ફૂટેજની મદદથી આરોપીની ઓળખ કરી તેને ઝડપી લેવામાં આવ્યો અને આગળની કાયદેસરની કાર્યવાહી માટે GRP/વેરાવળને સોંપવામાં આવ્યો.

76 વર્ષીય મુસાફર માનસિંહ, નિવાસી વૃંદાવન, જિલ્લા મથુરા (ઉત્તર પ્રદેશ), વેરાવળ સ્ટેશનના વેટિંગ રૂમમાં આરામ કરી રહ્યા હતા. તે દરમિયાન તેમનો કાળા રંગનો પીઠૂ બેગ ચોરાઈ ગયો હતો, જેમાં Vivo Android મોબાઇલ ફોન અને ચાર્જર સહિત અંદાજે ₹12,500/-ની કિંમતનો સામાન હતો.

માહિતી મળતાની સાથે જ RPF વેરાવળ દ્વારા CCTV ફૂટેજની તપાસ કરવામાં આવી, જેમાં એક વ્યક્તિ બેગ લઈ જતો જોવા મળ્યો હતો. ફૂટેજના આધારે RPF સ્ટાફ હેડ કોન્સ્ટેબલ વિજય ગુજરિયા તથા કોન્સ્ટેબલ અનુજ સિંહ દ્વારા સ્ટેશન અને પ્લેટફોર્મ વિસ્તારમાં શોધખોળ હાથ ધરવામાં આવી અને શંકાસ્પદ વ્યક્તિને પ્લેટફોર્મ નંબર 01 પરથી ઝડપી લેવામાં આવ્યો.

CCTV ફૂટેજ સાથેના મિલાન તથા પૂછપરછ બાદ તેની નિશાનદેહી પરથી ચોરાયેલો બેગ, મોબાઇલ ફોન તથા ચાર્જર મળી આવ્યા, જેની મુસાફરે ઓળખ કરી હતી. પકડાયેલા વ્યક્તિ ભૂપતભાઈ ચૌહાણ, નિવાસી કડિયાળી, જિલ્લા અમરેલીને મળેલા સામાન સાથે GRP/વેરાવળને સોંપવામાં આવ્યો. આ અંગે FIR નોંધવામાં આવી છે.

મંડળ રેલ પ્રબંધક, ભાવનગર, દિનેશ વર્માએ RPF કર્મચારીઓની તત્પરતા તથા પ્રશંસનીય કામગીરીની પ્રશંસા કરતાં જણાવ્યું કે મુસાફરોની સુરક્ષા અને સહાયતા રેલવેની પ્રાથમિક જવાબદારીઓમાં સામેલ છે. મંડળ સુરક્ષા આયુક્ત, ભાવનગર, અજય શર્માના માર્ગદર્શન હેઠળ ભાવનગર મંડળ RPF દ્વારા મુસાફરોની સુરક્ષા, સહાયતા તેમજ ચોરાયેલો/ખોવાયેલો સામાન પરત મેળવવા માટે સતત અસરકારક કાર્યવાહી કરવામાં આવી રહી છે.

વરિષ્ઠ મંડળ વાણિજ્ય પ્રબંધક, ભાવનગર, અતુલ કુમાર ત્રિપાઠીએ જણાવ્યું કે મુસાફરોનો સામાન સુરક્ષિત રીતે પરત મેળવવો મુસાફર સેવા અને સંવેદનશીલતાનો મહત્વપૂર્ણ હિસ્સો છે. પશ્ચિમ રેલવે મુસાફરોની સેવા, સુરક્ષા અને વિશ્વાસને સર્વોચ્ચ પ્રાથમિકતા આપીને સુરક્ષિત તથા સુવિધાજનક રેલ મુસાફરી સુનિશ્ચિત કરવા માટે સતત પ્રતિબદ્ધ છે.

---------------

હિન્દુસ્થાન સમાચાર / ભરતસિંહ જાદવ