અમરેલી, 25 ઓક્ટોબર (હિ.સ.) : અમરેલી જિલ્લાના લીલીયા તાલુકાના હાથીગઢ ગામે શ્રી સ્વામિનારાયણ મંદિર ખાતે ભવ્ય મૂર્તિ પ્રાણ પ્રતિષ્ઠા મહોત્સવનો ધાર્મિક અને સાંસ્કૃતિક ઉત્સવ ધામધૂમથી યોજાયો હતો. ગામમાં આ પ્રસંગને લઈને ભક્તો અને સ્થાનિક લોકોમાં ભારે ઉત્સાહ જોવા મળ્યો હતો. મંદિર પરિસરમાં વહેલી સવારથી જ ભક્તોની ભીડ ઉમટી પડી હતી.

પ્રાણ પ્રતિષ્ઠા વિધિ વિધિવત્ વૈદિક મંત્રોચ્ચાર વચ્ચે પૂજ્ય સંતો અને મહંતોના સાન્નિધ્યમાં પૂર્ણ કરવામાં આવી હતી. કાર્યક્રમ દરમિયાન શ્રી સ્વામિનારાયણ ભગવાનની મૂર્તિની સ્થાપના સાથે વિવિધ દેવમૂર્તિઓની પ્રતિષ્ઠા કરવામાં આવી. આ પ્રસંગે ભવ્ય શોભાયાત્રા, ભજન-કીર્તન, ધર્મસભા અને સંતોના આશીર્વચનનો કાર્યક્રમ યોજાયો હતો.

સ્થાનિક ગ્રામજનો, શ્રદ્ધાળુઓ અને આગેવાનોએ આ ધાર્મિક પ્રસંગમાં મોટી સંખ્યામાં હાજરી આપી હતી. સંતોએ પોતાના વચનામૃતમાં સદભાવ, સેવાભાવ અને ધાર્મિકતા જાળવવાનો સંદેશ આપ્યો હતો. અંતે આરતી અને પ્રસાદ વિતરણ સાથે કાર્યક્રમનો સમાપન થયો હતો.

હાથીગઢ ગામમાં યોજાયેલ આ પ્રાણ પ્રતિષ્ઠા મહોત્સવથી સમગ્ર વિસ્તારમાં ભક્તિમય માહોલ છવાયો હતો.

---------------

હિન્દુસ્થાન સમાચાર / Gondaliya Abhishek Nandrambhai