અમદાવાદ, 31 ડિસેમ્બર (હિ.સ.) : અમદાવાદ જિલ્લા મહિલા અને બાળ અધિકારીની કચેરી દ્વારા 'બેટી બચાવો, બેટી પઢાવો' યોજના અંતર્ગત ધોલેરા તાલુકાના ઓતરીયા સ્થિત ઉત્તર બુનિયાદી વિદ્યાલય ખાતે શાળાની વિદ્યાર્થીનીઓ માટે POCSO એક્ટ, 2012 (બાળકોનું લૈંગિક શોષણ નિવારણ અધિનિયમ) વિષયક વિશેષ જાગૃતિ કાર્યક્રમનું આયોજન કરવામાં આવ્યું હતું.
આ કાર્યક્રમનો મુખ્ય હેતુ કિશોરીઓને તેમના કાયદાકીય અધિકારો, વ્યક્તિગત સુરક્ષા અને ઓનલાઇન સુરક્ષાના પાસાઓથી અવગત કરવાનો હતો. ખાસ કરીને કિશોરીઓને 'ગુડ ટચ-બેડ ટચ' વચ્ચેનો તફાવત સમજાવી કોઈપણ અસુવિધાજનક પરિસ્થિતિમાં યોગ્ય સ્તરે ફરિયાદ કરવાની પ્રક્રિયા અંગે પણ વિદ્યાર્થીનીઓને વિસ્તૃત માર્ગદર્શન પૂરું પાડવામાં આવ્યું હતું.
કાર્યક્રમ દરમિયાન ઉપસ્થિત અધિકારીઓ અને તજજ્ઞો દ્વારા સરળ ભાષામાં POCSO એક્ટ, 2012ની વિવિધ જોગવાઈઓ વિશે સમજૂતી આપવામાં આવી હતી. 18 વર્ષથી ઓછી ઉંમરના બાળકો માટે કાયદામાં ઉપલબ્ધ સુરક્ષા કવચ અને કોઈપણ પ્રકારના શોષણ સામે ચૂપ રહેવાને બદલે હિંમતપૂર્વક યોગ્ય વ્યક્તિને જાણ કરવાના મહત્વ પર વિશેષ ભાર મૂકવામાં આવ્યો હતો. વિદ્યાર્થીનીઓ આ વિષયને ગંભીરતાથી સમજે તે માટે ઇન્ટરેક્ટિવ ગેમ્સ, પ્રશ્નોત્તરી અને પરિસ્થિતિ આધારિત પ્રવૃત્તિઓનું પણ સુંદર આયોજન કરવામાં આવ્યું હતું, જેમાં તમામ વિદ્યાર્થીનીઓએ ખૂબ જ ઉત્સાહપૂર્વક ભાગ લીધો હતો.
કાર્યક્રમના અંતે મારું શરીર, મારો અધિકારના સંદેશ સાથે વિધાર્થિનીઓને નિર્ભય બનવા પ્રોત્સાહિત કરવામાં આવી હતી. કોઈ પણ અનિચ્છનીય ઘટના સમયે ડર્યા વગર તાત્કાલિક ધોરણે પોતાના માતા-પિતા, શિક્ષક, પોલીસ અથવા ચાઇલ્ડ હેલ્પલાઇન નંબર 1098 પર સંપર્ક કરવા જણાવાયું હતું.
આ જાગૃતિ અભિયાનને પરિણામે વિધાર્થિનીઓમાં કાયદાકીય સમજ કેળવાઈ હતી અને તેમનામાં આત્મસુરક્ષા તેમજ આત્મવિશ્વાસમાં નોંધપાત્ર વધારો જોવા મળ્યો હતો.
---------------
હિન્દુસ્થાન સમાચાર / અભિષેક બારડ
