સુરત, 12 જુલાઈ (હિ.સ.)-સુરત જિલ્લાના તરસાડી વિસ્તારમાંથી એક વિવાદાસ્પદ ઘટના પ્રકાશમાં આવી છે, જ્યાં કોસંબા પોલીસે બુધવારે વધુ પડતી કાર્યવાહી કરતા એક ગુપ્ત જુગારધામ પર દરોડો પાડી નવો જુગારીઓને રંગે હાથ ઝડપી પાડ્યા છે. આરોપીઓમાં સ્થાનિક ભાજપના હોદેદાર અને સહકારી બેંકના ડિરેક્ટર જેવી જવાબદાર વ્યક્તિઓના નામ આવતા ચકચાર મચી ગઈ છે.

સિમેન્ટના ગોડાઉનમાં ચાલતું હતું જુગારધામ

બાતમીના આધારે પોલીસે કુંવરદા-કીમ માર્ગ પર આવેલ એક સિમેન્ટના ગોડાઉનમાં પતરા શેડ હેઠળ ચાલતું જુગારધામ પકડી પાડ્યું હતું. સ્થાનિક સ્તરે જાણ થઈ હતી કે અહીં છેલ્લા ઘણા સમયથી જુગાર રમાતો હતો, જેના કારણે આસપાસના વિસ્તારોમાં પણ ગેરકાયદેસર પ્રવૃત્તિઓની આશંકા ઉભી થઈ હતી.

પકડાયેલા લોકોની ઓળખ અને હોદ્દા

પોલીસે સ્થળ પરથી કુલ 9 વ્યક્તિઓને રોકડ રકમ ₹2.32 લાખ, 10 મોબાઇલ ફોન અને અન્ય મટિરિયલ મળીને અંદાજે ₹6 લાખથી વધુના મુદામાલ સાથે ઝડપી લીધા છે. પકડાયેલા આરોપીઓમાં નીચેના લોકો મુખ્યરૂપે સામેલ છે:

સંજય પરમાર: તરસાડી નગર ભાજપ સંગઠનના ઉપપ્રમુખ

દિગ્વિજય અટોદરિયા: તરસાડી નગર શક્તિ કેન્દ્રના સંયોજક

મહેન્દ્ર રામાણી: ઘી કોસંબા મર્કન્ટાઇલ કોઓપરેટિવ બેંકના ડિરેક્ટર

રાજકીય અને સામાજિક વલયોમાં મચી ચકચાર

ભાજપના હોદેદારો અને સહકારી બેંકના ડિરેક્ટર જેવા હોદ્દેદાર લોકોની એવા પ્રવૃત્તિમાં સંડોવણી સામે આવતા રાજકીય અને સામાજિક મંડળીઓમાં ભારે ચર્ચા શરૂ થઈ ગઈ છે. સાથે જ સોશિયલ મીડિયામાં પણ આ મુદ્દે ભારે ઉથલપાથલ જોવા મળી રહી છે.

હાલમાં કોસંબા પોલીસે આ તમામ આરોપીઓ સામે IPC અને જુગાર પ્રતિબંધક કાયદા હેઠળ ગુનો નોંધીને આગળની તપાસ શરૂ કરી છે.

---------------

હિન્દુસ્થાન સમાચાર / યજુવેન્દ્ર દુબે