ભુજ - કચ્છ, 17 જુલાઈ (હિ.સ.) : કિલ્લોલ કરતી ૬ વર્ષની રાયશ્રીને અચાનક હદયની બીમારીનું નિદાન થતાં કચ્છમાં મજૂરી કરીને ગુજરાન ચલવતા માતા પિતા ઉપર મુસિબતનું આભ ફાટ્યું. જોકે, ગુજરાત સરકારે બાળકીનું વાલીપણુ નિભાવ્યું અને આજે એ બાળકી હસતી રમતી કિલ્લોલ કરી રહી છે. વાત મુન્દ્રા તાલુકાના મોટા કપાયા ગામના વાડી વિસ્તારની છે.

2ડી ઇકો રીપોર્ટથી બિમારી સામે આવી

પિતા ગોપાલભાઇ બતિયા જણાવે છે કે, અગાઉ અમે મુન્દ્રા તાલુકાના ઝરપરા વાડી વિસ્તારમાં રહેતા હતા. રોજગારી અર્થે ત્યાંથી સ્થળાંતર કરીને તાલુકાના મોટા કપાયા વાડી વિસ્તારમાં રહેવા આવ્યા ત્યારે આરબીએસકે ટીમ દ્વારા અમારા ઘરની મુલાકાત લઇને બાળકી રાયશ્રીને આરોગ્ય તપાસ કરવામાં આવી હતી. તપાસ દરમિયાન હ્દયમાં કંઇ સમસ્યા હોવાનું માલૂમ પડતા વધુ તપાસ માટે 2ડી ઇકો રિપોર્ટ કરવામાં આવ્યો હતો.

તાત્કાલિક ઓપરેશનની સલાહ તબીબોએ આપી

તપાસના અંતે બાળકીને જન્મજાત હદયની ખામી હોવાનું જણાયું હતું. મેડિકલની ભાષામાં ડોક્ટરે Congenital Heart Disease(VSD) હોવાનું કહીને તત્કાલ ઓપરેશન કરાવવું પડશે તેવું જણાવતા ઓપરેશન માટે કંઇ રીતે નાણાં ભેગા થશે તે સવાલ ઉભો થયો હતો. પરંતુ રાજ્ય સરકાર રાષ્ટ્રીય બાલ સ્વાસ્થ્ય કાર્યક્રમ હેઠળ દેશના ભવિષ્ય એવા બાળકોના સ્વાસ્થ્યની ચિંતા કરીને તમામ સારવાર નિ:શુલ્ક કરી આપતી હોવાનું ડોક્ટરે જણાવતા હૈયામાં રાહત થઇ હતી.

અમદાવાદમાં ઓપરેશન સફળ થયું

વધુ સારવાર માટે દીકરીને અમદાવાદ યુ.એન.મહેતા હોસ્પિટલમાં રિફર કરવામાં આવી હતી. જ્યાં એક માસ પૂર્વે દીકરીનું સફળ ઓપરેશન કરાતા હાલમાં રાયશ્રી એકદમ સ્વસ્થ છે. ફરીથી હસતી-રમતી રાયશ્રીને જોઇને પરિવારની ખુશીનો પણ પાર નથી.

હિન્દુસ્થાન સમાચાર / BHAVIN K VORA