મહેસાણા, 30 ઓગસ્ટ (હિ.સ.) મહેસાણા વિધાનસભાના ગ્રામ્ય વિસ્તારમાં આવેલા હેબુઆ ગામે આજે મહત્વપૂર્ણ વિકાસકાર્યનો પ્રારંભ કરવામાં આવ્યો. ગામમાં નવીન બનેલા સી.સી. રોડ સાથે અન્ય વિકાસકાર્યનું ખાતમુહૂર્ત વિધિવત રીતે પૂર્ણ થયું. આ અવસરે સ્થાનિક આગેવાનો, સરપંચ, પદાધિકારીઓ તથા મોટી સંખ્યામાં ગામજનો ઉપસ્થિત રહ્યા હતા.
ગામમાં વર્ષોથી રહેવાસીઓ માટે રસ્તાઓની સમસ્યા ગંભીર હતી. વરસાદી ઋતુમાં કાચા રસ્તાઓ કાદવથી ભરાઈ જતા ગામજનોને ભારે મુશ્કેલીઓનો સામનો કરવો પડતો હતો. આ પરિસ્થિતિને ધ્યાને લઈને સરકાર દ્વારા હેબુઆ ગામ માટે સી.સી. રોડ બનાવવાની યોજના હાથ ધરવામાં આવી છે. નવા રસ્તાના નિર્માણથી ગામજનોને આવન-જાવનમાં સુવિધા મળશે, વાહન વ્યવહાર સરળ બનશે અને આરોગ્ય તથા શિક્ષણ સેવાઓ સુધી પહોંચ વધુ સહેલાઈથી શક્ય બનશે.
ખાતમુહૂર્ત પ્રસંગે ઉપસ્થિત આગેવાનોએ જણાવ્યું કે, ગ્રામ્ય વિસ્તારોનો વિકાસ એ સરકારની પ્રાથમિકતા છે અને દરેક ગામ સુધી સુવિધાઓ પહોંચાડવા સતત પ્રયત્ન કરવામાં આવી રહ્યા છે. ગામજનોમાં આ વિકાસકાર્યને લઈને હર્ષનો માહોલ જોવા મળ્યો હતો. આ નવા રસ્તા સાથે હેબુઆ ગામના વિકાસનો માર્ગ વધુ સુગમ બનશે તેવી આશા વ્યક્ત કરવામાં આવી.
---------------
હિન્દુસ્થાન સમાચાર / RINKU AMITKUMAR THAKOR
