ગીર સોમનાથ, 15 જાન્યુઆરી (હિ.સ.) : નેશનલ ઇન્સ્ટિટ્યૂટ ઓફ ઓપન સ્કૂલિંગ (NIOS) પ્રાદેશિક કેન્દ્ર, ગાંધીનગર દ્વારા ગુજરાતના ગીર સોમનાથ જિલ્લા અને કેન્દ્રશાસિત પ્રદેશ દીવમાં એક ભવ્ય જનજાગૃતિ કાર્યક્રમ યોજવામાં આવ્યો હતો. આ કાર્યક્રમનો મુખ્ય હેતુ છેવાડાના માનવી સુધી શિક્ષણની પહોંચ વધારવાનો હતો.
NIOS ના માનનીય પ્રમુખ પ્રો. અખિલેશ મિશ્રાએ આ કાર્યક્રમમાં વિશેષ ઉપસ્થિત રહી માર્ગદર્શન આપ્યું હતું. તેમની સાથે ગાંધીનગર પ્રાદેશિક કેન્દ્રના નિયામક ડૉ. રામ નારાયણ મીણા અને શિક્ષણ પ્રભારી સંદીપ પણ જોડાયા હતા.
પ્રો. અખિલેશ મિશ્રાએ જણાવ્યું કે ગુજરાતનો વિકાસ ઝડપી છે, અને ભારત સરકારની નવી શિક્ષણ નીતિ (NEP 2020) મુજબ રાજ્યના શિક્ષણ ક્ષેત્રમાં આધુનિક પરિવર્તનો લાવવા અનિવાર્ય છે.
આ કાર્યક્રમમાં શિક્ષણ જગતના વિવિધ હિસ્સેદારો સાથે સીધી ચર્ચા કરવામાં આવી હતી, જેમાં
દરિયાકાંઠાના માછીમાર સમુદાયના પ્રતિનિધિઓ.
સ્વ-સહાય જૂથો (SHGs) અને બિન-સરકારી સંસ્થાઓ (NGOs), ગ્રામીણ નાગરિકો અને લઘુમતી સમુદાયના પ્રતિનિધિઓ, શિક્ષણ ક્ષેત્રના ટ્રસ્ટીઓ અને AI સંયોજકો સામેલ રહ્યા હતા.
NIOS વિશ્વની સૌથી મોટી ઓપન અને ડિસ્ટન્સ લર્નિંગ સિસ્ટમ છે. પ્રો. અખિલેશ મિશ્રાએ NIOS ની લવચીક શિક્ષણ પ્રણાલી (Flexible Learning) પર ભાર મૂક્યો, જે ખાસ કરીને ગરીબ અને વંચિત વર્ગો માટે વરદાનરૂપ સાબિત થઈ શકે છે.
આ પ્રથમ પ્રસંગ છે જ્યારે કોઈ રાષ્ટ્રીય બોર્ડના અધ્યક્ષે પોતે ફિલ્ડમાં ઉતરીને છેવાડાના વિસ્તારોમાં શિક્ષણની સ્થિતિ અને પડકારો અંગે સ્થાનિક લોકો સાથે વિચાર-મંથન કર્યું હોય. NIOS ગાંધીનગરના પ્રાદેશિક નિયામક ડૉ. રામ નારાયણ મીણાએ ગીર સોમનાથના શિક્ષણથી વંચિત વર્ગોને મુખ્ય પ્રવાહમાં લાવવા માટેના પ્રયાસોની વિગતો રજૂ કરી હતી.
---------------
હિન્દુસ્થાન સમાચાર / ભરતસિંહ જાદવ
