કચ્છ, 01 ઓક્ટોબર (હિ.સ.) : કચ્છમાં નાસતા-ફરતા આરોપીઓ સામે પોલીસ દ્વારા હાથ ધરાયેલી કાર્યવાહી અંતર્ગત આદિપુર પોલીસે અમદાવાદ ગ્રામ્ય જિલ્લાના પ્રોહિબિશન કેસમાં છેલ્લા એક વર્ષથી ફરાર આરોપીને ઝડપી પાડ્યો છે. ચોક્કસ બાતમી અને માનવ સ્ત્રોતોના આધારે કરવામાં આવેલી કાર્યવાહી દરમિયાન આરોપીની આદિપુર વિસ્તારમાંથી ધરપકડ કરવામાં આવી હતી.

મળતી માહિતી મુજબ, અમદાવાદ ગ્રામ્ય જિલ્લાના કોઠ પોલીસ સ્ટેશનમાં વર્ષ 2025 દરમિયાન પ્રોહિબિશન સંબંધિત ગુનો નોંધાયો હતો. આ ગુનામાં સંડોવાયેલ આરોપી લાંબા સમયથી પોલીસની પકડથી દૂર રહેતો હતો અને છેલ્લા આશરે એક વર્ષથી નાસતો ફરતો હોવાનું પોલીસ તપાસમાં સામે આવ્યું હતું. આરોપીને ઝડપી પાડવા માટે પોલીસ દ્વારા સતત શોધખોળ કરવામાં આવી રહી હતી.

દરમિયાન પૂર્વ કચ્છ ગાંધીધામ જિલ્લામાં નાસતા-ફરતા આરોપીઓને ઝડપી પાડવા માટે ઉચ્ચ પોલીસ અધિકારીઓ દ્વારા જરૂરી સૂચનાઓ આપવામાં આવી હતી. જેના અનુસંધાને અંજાર વિભાગના નાયબ પોલીસ અધિક્ષક મુકેશ ચૌધરી તથા આદિપુર પોલીસ સ્ટેશનના પોલીસ ઇન્સ્પેક્ટર એમ.સી. વાળાના માર્ગદર્શન હેઠળ પોલીસ સ્ટાફે ફરાર આરોપીઓ અંગે માહિતી એકત્ર કરવાની કામગીરી તેજ કરી હતી.

આ દરમિયાન આદિપુર પોલીસને ચોક્કસ બાતમી મળી હતી કે અમદાવાદ ગ્રામ્યના કોઠ પોલીસ સ્ટેશનના પ્રોહિબિશન ગુનામાં છેલ્લા એક વર્ષથી ફરાર આરોપી આદિપુર વિસ્તારમાં હાજર છે. બાતમીના આધારે પોલીસ ટીમે સ્થળ પર પહોંચીને તપાસ હાથ ધરી હતી. તપાસ દરમિયાન આરોપી શકિર્તાસિંહ ગેમુભા જાડેજા, ઉંમર 39 વર્ષ, રહે. રવેચીનગર, મકાન નં. બી/64, અંતરજાળ, આદિપુર, તા. ગાંધીધામને ઝડપી પાડવામાં આવ્યો હતો.

પોલીસના જણાવ્યા અનુસાર આરોપી વિરુદ્ધ કોઠ પોલીસ સ્ટેશનમાં ગુનો નોંધાયેલો છે. આરોપીની ધરપકડ બાદ બી.એન.એસ.એસ.ની કલમ 35(1)(જે) મુજબ કાયદેસરની કાર્યવાહી કરવામાં આવી હતી.

આદિપુર પોલીસે પ્રાથમિક કાર્યવાહી પૂર્ણ કર્યા બાદ પકડાયેલા આરોપીને આગળની કાયદેસરની કાર્યવાહી માટે અમદાવાદ ગ્રામ્ય પોલીસને સોંપ્યો છે. સમગ્ર કામગીરી પોલીસ ઇન્સ્પેક્ટર એમ.સી. વાળા અને પોલીસ સબ-ઇન્સ્પેક્ટર આર.એમ. દુવા સાથે આદિપુર પોલીસ સ્ટેશનના સર્વેલન્સ સ્ટાફ દ્વારા કરવામાં આવી હતી. ફરાર આરોપીને શોધી કાઢવાની આ કાર્યવાહીથી લાંબા સમયથી પેન્ડિંગ રહેલા પ્રોહિબિશન કેસમાં પોલીસને મહત્વપૂર્ણ સફળતા મળી છે.

---------------

હિન્દુસ્થાન સમાચાર / Rohit Ramjibhai Padhiyar