
- એન્ટીમાઈક્રોબિયલ રેઝિસ્ટન્સ પર અંકુશ લાવવાની દિશામાં પગલું
નવી દિલ્હી, 19 નવેમ્બર (હિ.સ.) કેન્દ્રીય આરોગ્ય અને પરિવાર કલ્યાણ મંત્રાલયે, એન્ટીમાઈક્રોબિયલ દવાઓની ગુણવત્તા, સુરક્ષા અને અસરકારકતા સુનિશ્ચિત કરવા તથા એન્ટીમાઈક્રોબિયલ રેઝિસ્ટન્સ (એએમઆર) ના પડકારને પહોંચી વળવા માટે નવા ડ્રગ્સ અને ક્લિનિકલ ટ્રાયલ નિયમો, 2019 માં સુધારાનો પ્રસ્તાવ મૂક્યો છે. આ અંતર્ગત નિયમ 2(1)(ડબલ્યુ)(વી) માં આપવામાં આવેલી 'નવી દવા' ની વ્યાખ્યામાં એન્ટીમાઈક્રોબિયલ્સનો પણ સમાવેશ કરવામાં આવશે. મંત્રાલયે આ સંબંધમાં 6 નવેમ્બરના રોજ મુસદ્દા રાજપત્ર જાહેરનામું જીએસઆર 983 (ઈ) બહાર પાડ્યું છે. સૂચિત સુધારાનો ઉદ્દેશ્ય એન્ટીમાઈક્રોબિયલ દવાઓને નવી દવાઓ પર લાગુ થતી નિયામક વ્યવસ્થાના દાયરામાં લાવવાનો છે, જેથી તેમના ઉત્પાદન અને ગુણવત્તા પર કેન્દ્રીય સ્તરે અસરકારક દેખરેખ સુનિશ્ચિત કરી શકાય.
મંત્રાલયના જણાવ્યા અનુસાર, એન્ટીમાઈક્રોબિયલ રેઝિસ્ટન્સ વૈશ્વિક સ્તરે જાહેર આરોગ્ય માટે એક ગંભીર પડકાર બની ગયો છે. આ સમસ્યાને પહોંચી વળવા માટે સંકલિત પ્રયાસોની જરૂર છે. જી-20 નવી દિલ્હી નેતાઓના જાહેરનામામાં પણ 'વન હેલ્થ' અભિગમ હેઠળ એન્ટીમાઈક્રોબિયલ રેઝિસ્ટન્સ સામે લડવા પર ભાર મૂકવામાં આવ્યો હતો.
આરોગ્ય મંત્રાલયે, એન્ટીમાઈક્રોબિયલ ઉત્પાદનોના ઉત્પાદન લાયસન્સ પૂરતી નિયામકીય તપાસ વગર જારી કરવામાં આવવા અંગે ચિંતા વ્યક્ત કરી છે. આમાં જૈવ પ્રાપ્યતા અને જૈવ સમાનતા (બાયોઅવેલેબિલિટી/બાયોઈક્વિવેલન્સ) અને સ્થિરતા (સ્ટેબિલિટી) જેવા આવશ્યક અભ્યાસોનો અભાવ પણ સામેલ છે. આ પરીક્ષણોના અભાવે દવાઓની ગુણવત્તા, સુરક્ષા અને અસરકારકતા પ્રભાવિત થઈ શકે છે. મંત્રાલયનું કહેવું છે કે હલકી ગુણવત્તાવાળી અથવા બિનઅસરકારક એન્ટીમાઈક્રોબિયલ દવાઓના ઉપયોગથી એન્ટીમાઈક્રોબિયલ રેઝિસ્ટન્સ વિકસિત થવાનું અને ફેલાવાનું જોખમ વધી શકે છે. આનાથી દર્દીઓની સુરક્ષા પર પણ પ્રતિકૂળ અસર પડે છે.
સૂચિત સુધારો અમલમાં આવ્યા પછી એન્ટીમાઈક્રોબિયલ દવાઓના ઉત્પાદકોએ સંબંધિત રાજ્ય લાયસન્સિંગ સત્તામંડળ પાસેથી ઉત્પાદન લાયસન્સ માટે અરજી કરતા પહેલા કેન્દ્રીય લાયસન્સિંગ સત્તામંડળ (સીએલએ) પાસેથી પરવાનગી મેળવવી પડશે. આનાથી આ દવાઓના ઉત્પાદન પર કેન્દ્રીય નિયામકીય દેખરેખ મજબૂત થશે અને તેમની ગુણવત્તા, સુરક્ષા તેમજ અસરકારકતા સુનિશ્ચિત કરવામાં મદદ મળશે. 30 દિવસમાં સૂચનો અને વાંધાઓ મંગાવવામાં આવ્યા મંત્રાલયે સૂચિત સુધારા પર અંતિમ નિર્ણય લેતા પહેલા સંબંધિત પક્ષો અને સામાન્ય લોકો પાસેથી સૂચનો અને વાંધાઓ આમંત્રિત કર્યા છે. જાહેરનામાના મુસદ્દા નિયમોને રાજપત્રમાં જાહેર કરવામાં આવ્યાની તારીખથી 30 દિવસની અંદર સૂચનો અને વાંધાઓ મોકલી શકાય છે. આ સૂચનો અવર સચિવ (ડ્રગ્સ), આરોગ્ય અને પરિવાર કલ્યાણ મંત્રાલયની કચેરી, કર્તવ્ય ભવન-1 પર મોકલી શકાય છે. સૂચિત સુધારાનું મુસદ્દા રાજપત્ર જાહેરનામું મંત્રાલય દ્વારા જારી કરવામાં આવેલી સત્તાવાર લિંક પર ઉપલબ્ધ છે.
હિન્દુસ્થાન સમાચાર / વિજયાલક્ષ્મી / સંજીવ પાશ
હિન્દુસ્થાન સમાચાર / માધવી વ્યાસ