કચ્છ, 02 નવેમ્બર (હિ.સ.) કાયદો અને વ્યવસ્થાની જાળવણી કરવાની સાથે પ્રજાની સુરક્ષા અને સેવા માટે હંમેશા તત્પર રહેતી પોલીસનું માનવીય સ્વરૂપ ભચાઉમાં જોવા મળ્યું છે. મોટી ચિરઈ કોલોનીમાંથી ગુમ થયેલા માત્ર ચાર વર્ષના માસૂમ બાળકને ભચાઉ પોલીસે સમયસર શોધી કાઢી તેના પરિવારજનોને સલામત રીતે પરત સોંપ્યો હતો. પોલીસની આ સંવેદનશીલ અને માનવતાવાદી કામગીરીને પગલે પરિવારજનોએ રાહતનો શ્વાસ લીધો હતો.

મળતી વિગતો મુજબ, ભચાઉ પોલીસ સ્ટેશનની હદમાં આવેલા મોટી ચિરઈ કોલોની વિસ્તારમાંથી ચાર વર્ષનું એક બાળક ગુમ થયું હતું. નાની ઉંમરના બાળકના ગુમ થવાની ઘટનાને ગંભીરતાથી લેતા ભચાઉ પોલીસ દ્વારા તેને શોધવા માટે તાત્કાલિક પ્રયાસો હાથ ધરવામાં આવ્યા હતા. બાળકની સુરક્ષા અને તેને વહેલી તકે પરિવાર સુધી પહોંચાડવાની પ્રાથમિકતાને ધ્યાનમાં રાખીને પોલીસ ઇન્સ્પેક્ટર સહિતના પોલીસ સ્ટાફે સક્રિયતા દાખવી હતી. પોલીસની સતર્કતા અને સમયસર કરવામાં આવેલા પ્રયાસોના પરિણામે ગુમ થયેલા બાળકને શોધી કાઢવામાં સફળતા મળી હતી.

ત્યારબાદ બાળકને તેના વાલી-વારસને સુરક્ષિત રીતે સોંપવામાં આવ્યો હતો. લાંબા સમયથી બાળક અંગે ચિંતિત પરિવારજનો માટે આ ક્ષણ મોટી રાહત સમાન બની હતી. બાળકને હેમખેમ પરત મેળવી પરિવારજનોમાં ખુશીનો માહોલ છવાયો હતો. આ સમગ્ર કામગીરી દરમિયાન પોલીસે માત્ર ફરજ નિભાવી એટલું જ નહીં, પરંતુ એક પરિવારની ચિંતા અને લાગણીને સમજી માનવતાનું ઉત્તમ ઉદાહરણ પૂરું પાડ્યું હતું.

ઉલ્લેખનીય છે કે પોલીસ અને પ્રજા વચ્ચે વધુ સારો સમન્વય સ્થાપિત થાય તેમજ સામાન્ય નાગરિકોમાં પોલીસ પ્રત્યે વિશ્વાસ અને હકારાત્મક અભિગમ મજબૂત બને તે દિશામાં ઉચ્ચ પોલીસ અધિકારીઓ દ્વારા સતત સૂચનાઓ આપવામાં આવી રહી છે.

આ સરાહનીય કામગીરી પોલીસ ઇન્સ્પેક્ટર ભચાઉ પોલીસ સ્ટેશન તથા તેમની ટીમ દ્વારા કરવામાં આવી હતી. ચાર વર્ષના બાળકને હેમખેમ પરિવાર સુધી પહોંચાડવાની આ કામગીરીએ સાબિત કર્યું છે કે પોલીસની ફરજ માત્ર ગુનાઓ અટકાવવા પૂરતી સીમિત નથી, પરંતુ મુશ્કેલીના સમયે નાગરિકોની પડખે ઊભા રહેવું પણ એટલું જ મહત્ત્વનું છે.

હિન્દુસ્થાન સમાચાર / Rohit Ramjibhai Padhiyar