-સગીર વયની બાળકી સાથે દુષ્કર્મ આચર્યાના આરોપસર 19 વર્ષીય યુવકની ધરપકડ, ટેકનિકલ એનાલિસિસ અને હ્યુમન સોર્સિસની મદદથી પોલીસને મળી સફળતા

કચ્છ, 02 નવેમ્બર (હિ.સ.) કચ્છના રાપર વિસ્તારમાં સગીર વયની બાળકી સાથે દુષ્કર્મ આચરવાના ગંભીર બનાવમાં રાપર પોલીસે ઝડપી કાર્યવાહી કરીને ગણતરીના કલાકોમાં જ આરોપીને ઝડપી પાડ્યો છે. ભારતીય ન્યાય સંહિતા અને પોક્સો એક્ટની વિવિધ કલમો હેઠળ ગુનો નોંધાયા બાદ પોલીસે આરોપીને શોધી કાઢવા માટે તપાસનો ધમધમાટ શરૂ કર્યો હતો. પોલીસની સમયસરની કાર્યવાહીથી આ ગુનાના આરોપી સુધી પહોંચવામાં સફળતા મળી છે.

પ્રાપ્ત વિગતો અનુસાર, રાપર પોલીસ સ્ટેશનમાં ગુના હેઠળ ભારતીય ન્યાય સંહિતા 2023ની કલમ 137(2), 87 અને 64(2)(M) તેમજ પોક્સો એક્ટની કલમ 4, 6 અને 18 મુજબ ગુનો નોંધવામાં આવ્યો હતો. પોલીસ ફરિયાદમાં સગીર વયની બાળકી સાથે આરોપીએ દુષ્કર્મ આચર્યાનો ઉલ્લેખ કરવામાં આવ્યો છે. બનાવની ગંભીરતાને ધ્યાનમાં રાખીને આરોપીને વહેલી તકે પકડી પાડવા ઉચ્ચ પોલીસ અધિકારીઓ દ્વારા જરૂરી સૂચનાઓ આપવામાં આવી હતી.

રાપર પોલીસ સ્ટેશનના પોલીસ ઇન્સ્પેક્ટર આર.એલ. ખટાણાએ આરોપીને શોધી કાઢવા માટે વિશેષ એક્શન પ્લાન તૈયાર કર્યો હતો. પોલીસે ટેકનિકલ એનાલિસિસ અને હ્યુમન સોર્સિસની મદદથી તપાસને આગળ ધપાવી હતી. જેના પરિણામે ગુનામાં સંડોવાયેલા હોવાના આરોપસર ગંગારામ રમેશભાઈ કોલી રહે. શાંતિનગર, સામખિયાળી, તાલુકો ભચાઉ, કચ્છને ગણતરીના કલાકોમાં ઝડપી પાડવામાં આવ્યો હતો.

આરોપીની ધરપકડ બાદ તેની વિરુદ્ધ કાયદેસરની કાર્યવાહી હાથ ધરવામાં આવી છે. આ સમગ્ર કામગીરી પોલીસ ઇન્સ્પેક્ટર આર.એલ. ખટાણાના માર્ગદર્શન હેઠળ રાપર પોલીસ સ્ટેશનના અધિકારીઓ અને કર્મચારીઓ દ્વારા કરવામાં આવી હતી. સગીર વયની બાળકી સાથે સંકળાયેલા આ ગંભીર પ્રકરણમાં પોલીસની ઝડપી કાર્યવાહીથી તપાસને મહત્વપૂર્ણ દિશા મળી છે.

હિન્દુસ્થાન સમાચાર / Rohit Ramjibhai Padhiyar