અમરેલી,17 માર્ચ (હિ.સ.) અમરેલી જિલ્લામાં સતત વધતા મિલકત સંબંધિત ગુનાઓને ધ્યાનમાં રાખીને પોલીસ તંત્ર દ્વારા કડક કાર્યવાહી હાથ ધરવામાં આવી છે. જિલ્લામાં ચોરી, લૂંટફાટ અને અન્ય મિલકત ગુનાઓમાં સંડોવાયેલા આરોપી રામકુ વાઘેલાની સામે જિલ્લા પોલીસ દ્વારા પાસા (PASA) હેઠળ કાર્યવાહી કરવામાં આવી છે. આરોપી લાંબા સમયથી વિવિધ ગુનાઓમાં સંડોવાયેલ હોવાની માહિતી સામે આવતા, તેના વિરુદ્ધ પુરાવાઓના આધારે કાયદેસરની કાર્યવાહી હાથ ધરાઈ હતી.

અમરેલી લોકલ ક્રાઈમ બ્રાન્ચ (LCB) દ્વારા રામકુ વાઘેલાને કસ્ટડીમાં લઈને જરૂરી કાનૂની પ્રક્રિયા પૂર્ણ કરવામાં આવી હતી. બાદમાં, જિલ્લા મેજિસ્ટ્રેટના આદેશ અનુસાર તેને જાહેર સલામતી અધિનિયમ હેઠળ અટકાયત કરી પાલનપુર જેલ ખાતે ખસેડવામાં આવ્યો છે. પોલીસે જણાવ્યું કે આરોપી વિસ્તારમાં ભયનું વાતાવરણ ઉભું કરી રહ્યો હતો અને સામાન્ય જનજીવન માટે ખતરો બની ગયો હતો.

આ કાર્યવાહીથી જિલ્લામાં કાયદો અને વ્યવસ્થા જાળવવામાં મદદ મળશે અને આવા તત્વોને કડક સંદેશો મળશે. પોલીસ તંત્રએ વધુમાં જણાવ્યું કે ભવિષ્યમાં પણ આવી પ્રવૃત્તિઓ સામે કડક પગલાં લેવામાં આવશે.

---------------

હિન્દુસ્થાન સમાચાર / Gondaliya Abhishek Nandrambhai