સુરત, 24 માર્ચ (હિ.સ.): સુરતના અશ્વિનીકુમાર વિસ્તારમાં વ્યાપારિક ઉઘરાણીના વિવાદને કારણે એક પરિવાર ગંભીર સંકટમાં મુકાયો છે. હોટ ફિક્સ મશીનના કામ સાથે જોડાયેલા 32 વર્ષીય યુવાને કરોડો રૂપિયાની બાકી રકમ ન મળતા માનસિક દબાણમાં આવી ઝેરી દવા પી આત્મહત્યાનો પ્રયાસ કર્યો હતો. ઘટનાથી પહેલા તેણે બે પાનાની સુસાઈડ નોટ પણ લખી હોવાનું જાણવા મળે છે.

માહિતી મુજબ, યુવાને કાપડના વેપારી માટે મોટું જોબવર્ક કર્યું હતું, જેના બદલામાં અંદાજે 3 કરોડથી વધુની રકમ લેવાની હતી. લાંબા સમયથી ઉઘરાણી કરવા છતાં માત્ર થોડો જ ભાગ મળ્યો હતો, જ્યારે બાકી રકમ માટે વારંવાર વચનો આપવામાં આવતા હતા. તાજેતરમાં પોલીસ મથકે બોલાવી સમાધાન કરવાની જગ્યાએ ધમકી આપવામાં આવી હોવાનો પરિવારનો આક્ષેપ છે.

આ તણાવ વચ્ચે યુવકે ઝેર પી લીધું અને તેને તાત્કાલિક હોસ્પિટલ ખસેડવામાં આવ્યો. ત્યાં પુત્રને ગંભીર હાલતમાં જોઈ માતા પણ તૂટીને પડી અને તેણે પણ ઝેર પી લીધું, જેના કારણે હોસ્પિટલમાં અફરાતફરી મચી ગઈ. હાલ બંનેની સ્થિતિ ગંભીર હોવાનું જણાવાયું છે.

પરિવારે આ સમગ્ર મામલે છેતરપિંડી અને દબાણનો આરોપ લગાવ્યો છે, જ્યારે સામે પક્ષે આ આરોપોને નકારી કાઢ્યા છે. પોલીસ દ્વારા સમગ્ર ઘટનાની તપાસ શરૂ કરવામાં આવી છે અને બંને પક્ષોના નિવેદનો લઈ આગળની કાર્યવાહી હાથ ધરાઈ રહી છે.

---------------

હિન્દુસ્થાન સમાચાર / યજુવેન્દ્ર દુબે