પોરબંદર, 31 માર્ચ (હિ.સ.)ભગવાન શ્રી કૃષ્ણ અને દેવી શ્રી રુકમણીજીના પાવન વિવાહ પ્રસંગે ઉજવાતા ઐતિહાસિક માધવપુર ઘેડ લોકમેળાના ત્રીજા દિવસે ભક્તિ અને સાંસ્કૃતિક રંગતનું અનોખું સંમિશ્રણ જોવા મળ્યું હતું. આ પ્રસંગે માંગરોળ-માળિયાના ધારાસભ્ય ભગવાનજી કરગઠીયા સહિત અનેક મહાનુભાવો ઉપસ્થિત રહી કાર્યક્રમને ગૌરવ અપાવ્યું હતું.

મેળામાં આસામ સહિત નોર્થ-ઈસ્ટ ભારતના કલાકારો દ્વારા કૃષ્ણ-રુક્મિણી હરણ, ઢોલક ચોલમ અને બિહુ નૃત્ય, જેવી લોકપ્રિય અને આકર્ષક સાંસ્કૃતિક પ્રસ્તુતિઓ રજૂ કરવામાં આવી હતી.

આસામના કલાકારોએ ભગવાન શ્રીકૃષ્ણ રુકમણી હરણનો પ્રસંગ ખૂબ જ સારી રીતે પ્રસ્તુત કર્યો હતો.આ સાથે ગુજરાતના કલાકારો દ્વારા મણિયારો, ગરબા, હૂડા રાસ અને ટીપ્પણી નૃત્ય જેવી વિવિધ પરંપરાગત લોકકલાઓનું જીવંત પ્રદર્શન કરવામાં આવ્યું હતું.

દેશના વિવિધ ભાગોની સંસ્કૃતિઓનું આ સુંદર સંગમ “એક ભારત શ્રેષ્ઠ ભારત”ની ભાવનાને ઉજાગર કરતો રહ્યો હતો. આ રંગબેરંગી અને જીવંત સાંસ્કૃતિક કાર્યક્રમોએ ઉપસ્થિત જનસમૂહને મંત્રમુગ્ધ બનાવી દીધા હતા અને મેળાના ત્રીજા દિવસને આ ભવ્ય સાંસ્કૃતિક પ્રસ્તુતિઓએ યાદગાર બનાવ્યો હતો અને પ્રખ્યાત કલાકાર ઋષભ આહિરે કોન્સર્ટ પરફોર્મ કરીને જમાવટ કરી હતી અને તેમની આગવી શૈલીમાં કરેલી પ્રસ્તુતિએ લોકોને ડોલાવ્યા હતાં.

આ પ્રસંગે પોરબંદર નાયબ પોલીસ અધિક્ષક ઋતુ રાબા,પ્રાંત અધિકારી સંદિપ જાદવ,જિલ્લા શિક્ષણ અધિકારી વિનોદ પરમાર સહિતના મહાનુભાવો અને અગ્રણીઓ ઉપસ્થિત રહ્યાં હતાં.

---------------

હિન્દુસ્થાન સમાચાર / Tejas Pravinbhai Dholariya