- HPV વેક્સિન અંગે માર્ગદર્શન આપવામાં આવ્યું.

બોટાદ, 16 એપ્રિલ (હિ.સ.) : બોટાદ જિલ્લાના પીએચસી ખોપાળા હેઠળ આવેલા આયુષ્યમાન આરોગ્ય મંદિર અડતાળા ખાતે મમતા દિવસ નિમિત્તે મહત્વપૂર્ણ આરોગ્ય કાર્યક્રમ યોજાયો હતો. આ પ્રસંગે મુખ્ય જિલ્લા આરોગ્ય અધિકારી, જિલ્લા પબ્લિક હેલ્થ નર્સ (PHN) તેમજ જિલ્લા MPHS દ્વારા આરોગ્ય કેન્દ્રની મુલાકાત લેવામાં આવી હતી અને કામગીરીનું નિરીક્ષણ કરવામાં આવ્યું હતું.

મમતા દિવસ અંતર્ગત ગર્ભવતી મહિલાઓ, સ્તનપાન કરાવતી માતાઓ અને નાના બાળકોને જરૂરી આરોગ્ય સેવાઓ પૂરી પાડવામાં આવી હતી. આરોગ્ય ટીમ દ્વારા રસીકરણ, પોષણ, સ્વચ્છતા અને માતા-બાળ આરોગ્ય અંગે માર્ગદર્શન આપવામાં આવ્યું હતું. ખાસ કરીને ગ્રામ્ય વિસ્તારોમાં આરોગ્ય જાગૃતિ વધારવા માટે આ પ્રકારના કાર્યક્રમો અત્યંત મહત્વપૂર્ણ સાબિત થાય છે.

આ સાથે HPV વેક્સિન અંગે પણ વિસ્તૃત માહિતી આપવામાં આવી હતી. નિષ્ણાતોએ યુવતીઓમાં સર્વાઇકલ કેન્સરથી બચાવ માટે HPV રસીના મહત્વ પર પ્રકાશ પાડ્યો હતો અને યોગ્ય સમય પર રસી લેવાની જરૂરિયાત સમજાવી હતી. માતાપિતા અને લાભાર્થીઓને આ રસી અંગેની શંકાઓ દૂર કરી તેમને જાગૃત કરવામાં આવ્યા હતા. મુલાકાત દરમિયાન અધિકારીઓએ આરોગ્ય કેન્દ્રની સેવાઓ, દવાઓની ઉપલબ્ધતા તેમજ રેકોર્ડ સંભાળવાની પ્રક્રિયા અંગે પણ સમીક્ષા કરી હતી. જ્યાં જરૂર જણાઈ ત્યાં સુધારણા માટે સૂચનો આપવામાં આવ્યા હતા.

આ કાર્યક્રમનો મુખ્ય હેતુ ગ્રામ્ય વિસ્તારોમાં આરોગ્ય સેવાઓને વધુ સશક્ત બનાવવાનો અને લોકોમાં આરોગ્ય પ્રત્યે જાગૃતિ લાવવાનો રહ્યો હતો. આવા પ્રયત્નોથી માતા અને બાળકના આરોગ્યમાં સુધારો થવાની સાથે સાથે ગંભીર બીમારીઓ સામે રક્ષણ મેળવવામાં મદદ મળે છે.

---------------

હિન્દુસ્થાન સમાચાર / GONDALIYA DISHANT