અમરેલી, 17 એપ્રિલ (હિ.સ.) : અમરેલી જિલ્લામાં પાણીની સમસ્યાનો કાયમી ઉકેલ લાવવા માટે વિશાળ સ્તરે જળ સંચયના કામો શરૂ કરવામાં આવ્યા છે. જિલ્લામાં કુલ 160 ગામોમાં તળાવો અને ચેકડેમ ઊંડા ઉતારવાની તેમજ રીપેરિંગ કરવાની કામગીરી જોરશોરથી ચાલી રહી છે. આ સમગ્ર અભિયાન ગીર ગંગા પરિવાર ટ્રસ્ટ દ્વારા હાથ ધરવામાં આવ્યું છે, જે સૌરાષ્ટ્રમાં વર્ષોથી “જળ એ જ જીવન”ના મંત્ર સાથે કાર્યરત છે.

આ અંગે માહિતી આપતા શયલેશભાઈ ઠુમરે જણાવ્યું હતું કે અમરેલી જિલ્લામાં ચાલી રહેલા આ જળ સંચયના કામો ઐતિહાસિક સાબિત થઈ રહ્યા છે. વર્ષોથી પાણીની તંગી સહન કરનાર આ વિસ્તાર માટે આ પહેલ આશાની નવી કિરણ બની છે. જૂના ચેકડેમોને રીપેર કરવાના તેમજ તેમને વધુ ઊંડા ઉતારવાના કામો દ્વારા વરસાદી પાણીનો વધુ સંગ્રહ શક્ય બનશે.

આ ઉપરાંત ગામોના સીમ વિસ્તારમાં નાના-નાના પાડા (મોકળાવ) બાંધીને વરસાદી પાણી વહી જતું અટકાવવાના પ્રયાસો પણ કરવામાં આવી રહ્યા છે. આ પગલાંઓના કારણે જમીનમાં પાણીનો સ્તર વધશે અને બોરવેલ તેમજ કૂવાઓમાં પાણી ટકશે. પરિણામે પીવાના પાણી અને સિંચાઈ માટે પાણીની ઉપલબ્ધિમાં નોંધપાત્ર વધારો થશે.

ગીર ગંગા પરિવાર ટ્રસ્ટ દ્વારા અત્યાર સુધીમાં 9,000થી વધુ જળ સંચયના કામો પૂર્ણ કરવામાં આવ્યા છે, જે પોતે જ એક વિશાળ સિદ્ધિ છે. ટ્રસ્ટના સતત પ્રયત્નોથી જ્યાં એક સમય ઉનાળામાં પાણીની તંગી ઊભી થતી હતી, ત્યાં આજે ઘણાં વિસ્તારોમાં પાણી ઉપલબ્ધ થવા લાગ્યું છે. આ પરિવર્તન સ્થાનિક લોકો માટે જીવનદાયી સાબિત થયું છે.

જળ સંચયના આ અભિયાનનો સીધો લાભ ખેડૂતોને મળી રહ્યો છે. જમીનમાં પાણીની સપાટી ઊંચી આવતાં ખેતી માટે જરૂરી પાણી સરળતાથી ઉપલબ્ધ થઈ રહ્યું છે, જેના કારણે પાક ઉત્પાદનમાં વધારો નોંધાયો છે. સાથે સાથે પશુપાલકો માટે પણ આ પહેલ લાભદાયી બની છે, કારણ કે પાણીની ઉપલબ્ધિને કારણે ઘાસચારો પણ વધુ પ્રમાણમાં ઉગે છે.

આ અભિયાનમાં સ્થાનિક ગ્રામજનો, ખેડૂતો અને અગ્રણી વ્યક્તિઓ પણ ઉત્સાહભેર જોડાયા છે. ઘણા ગામોમાં લોકો શ્રમદાન આપી આ કાર્યમાં પોતાનો ફાળો આપી રહ્યા છે, જે સમાજમાં એકતા અને સહકારની ભાવનાને વધુ મજબૂત બનાવે છે. “ભાગીરથ કાર્ય” તરીકે ઓળખાતું આ અભિયાન માત્ર સરકારી કે ટ્રસ્ટ સ્તરે સીમિત નથી, પરંતુ લોકોની સહભાગીતાથી એક જનઆંદોલન બની ગયું છે.

અમરેલી જિલ્લામાં ચાલી રહેલા આ જળ સંચયના પ્રયાસો ભવિષ્યમાં પાણીની સમસ્યાને હલ કરવા માટે એક ઉત્તમ મોડેલ બની શકે છે. જો આ જ રીતે સતત કાર્ય ચાલુ રહેશે તો આવનારા વર્ષોમાં અમરેલી જિલ્લો પાણીની દ્રષ્ટિએ સ્વાવલંબન તરફ આગળ વધશે.

---------------

હિન્દુસ્થાન સમાચાર / Gondaliya Abhishek Nandrambhai