હૈદરાબાદ, નવી દિલ્હી, 18 એપ્રિલ (હિ.સ.) સેન્ટ્રલ બ્યુરો ઓફ ઇન્વેસ્ટિગેશન (સીબીઆઈ) એ 'ડિજિટલ અરેસ્ટ' દ્વારા કરવામાં આવેલી સાયબર છેતરપિંડીના મામલામાં તેલંગાણા અને આંધ્ર પ્રદેશમાં પાંચ સ્થળોએ દરોડા પાડીને ત્રણ લોકોની ધરપકડ કરી છે. સીબીઆઈના જણાવ્યા અનુસાર, ધરપકડ કરાયેલા આરોપીઓમાં ઇન્ડસઇન્ડ બેંકના તત્કાલીન આસિસ્ટન્ટ મેનેજર દુબ્બાકા મહેશ, રાજેશ કન્ના અને વાયાલા શ્રીનિવાસ સામેલ છે. આ તપાસ સુપ્રીમ કોર્ટના નિર્દેશનો એક ભાગ છે, જેમાં એક વરિષ્ઠ નાગરિકને ડિજિટલ અરેસ્ટ કરી 1.6 કરોડ રૂપિયાથી વધુની રકમ ટ્રાન્સફર કરવા માટે મજબૂર કરવામાં આવ્યા હતા.

તપાસમાં બહાર આવ્યું છે કે, છેતરપિંડીની રકમ એક નકલી કંપનીના નામે ખોલવામાં આવેલા બેંક ખાતામાં ટ્રાન્સફર કરવામાં આવી હતી, જેથી સાયબર ક્રાઈમ દ્વારા મેળવેલા નાણાંની સરળતાથી હેરફેર કરી શકાય. ધરપકડ કરાયેલા બેંક અધિકારી પર આરોપ છે કે, તેણે આ નકલી ખાતું ખોલાવવામાં મહત્વની ભૂમિકા ભજવી હતી. અન્ય બે આરોપીઓ કથિત રીતે ‘મ્યુલ એકાઉન્ટ્સ’ (નકલી ખાતાઓ) ની વ્યવસ્થા કરવામાં અને વિવિધ ખાતાઓ દ્વારા પૈસાની હેરફેર કરવામાં સામેલ હતા.

સીબીઆઈએ જણાવ્યું કે, આરોપીઓના ઠેકાણાઓ પર દરોડા દરમિયાન અનેક વાંધાજનક દસ્તાવેજો અને ઈલેક્ટ્રોનિક ઉપકરણો મળી આવ્યા છે.

હિન્દુસ્થાન સમાચાર / પ્રશાંત શેખર / પવન કુમાર

હિન્દુસ્થાન સમાચાર / ડો.હિતેશ એન.વ્યાસ