બોટાદ, 21 એપ્રિલ (હિ.સ.)બોટાદ જિલ્લામાં માર્ગ સલામતીને વધુ મજબૂત બનાવવા માટે પ્રત્યક્ષ સ્તરે અસરકારક પગલાં લેવામાં આવી રહ્યા છે. આ દિશામાં ARTO બોટાદ દ્વારા બાબરકોટ-પાળિયાદ APMC ખાતે વિશેષ અભિયાન હાથ ધરવામાં આવ્યું હતું, જેમાં આશરે ૬૦ જેટલા ટ્રેલર અને અન્ય ભારવાહક વાહનો પર રેડિયમ રિફ્લેક્ટર લગાવવામાં આવ્યા હતા.
આ અભિયાનનો મુખ્ય ઉદ્દેશ ખાસ કરીને રાત્રિના સમયમાં માર્ગ પર ચાલતા ભારવાહક વાહનોને વધુ સ્પષ્ટ બનાવવાનો છે. ઘણીવાર રાત્રિના અંધારામાં આવા મોટા વાહનો સ્પષ્ટ દેખાતા નથી, જેના કારણે અકસ્માતોની સંભાવના વધે છે. રેડિયમ રિફ્લેક્ટર લગાવવાથી પાછળથી આવતા વાહનચાલકોને સમયસર સંકેત મળી રહે છે અને અકસ્માતો ટાળવામાં મદદ મળે છે.
અભિયાન દરમિયાન માત્ર ટેકનિકલ કામગીરી જ નહીં પરંતુ વાહનચાલકોમાં જાગૃતિ ફેલાવવા પર પણ ભાર મુકાયો હતો. અધિકારીઓએ ડ્રાઇવરો સાથે સંવાદ સ્થાપી તેમને માર્ગ સલામતીના નિયમો, ઓવરલોડિંગના જોખમો અને નિયમિત વાહન તપાસ અંગે માર્ગદર્શન આપ્યું હતું. સાથે જ સલામત અને જવાબદાર ડ્રાઇવિંગ માટે પ્રેરણા પણ આપવામાં આવી હતી.
આ પહેલને વાહનચાલકો દ્વારા પણ સારો પ્રતિસાદ મળ્યો હતો. ઘણા ડ્રાઇવરોને આવી કામગીરીથી પોતાની અને અન્યની સુરક્ષા માટે જાગૃતિ આવી હોવાનું જણાયું હતું.
પ્રાદેશિક વાહન વ્યવહાર કચેરી, બોટાદ દ્વારા જિલ્લા સ્તરે માર્ગ સલામતીને પ્રાથમિકતા આપી સતત નવી પહેલો હાથ ધરવામાં આવી રહી છે. આવા પ્રયાસો અકસ્માતોમાં ઘટાડો લાવવા અને જનહિત સુરક્ષિત રાખવામાં મહત્વપૂર્ણ સાબિત થઈ રહ્યા છે.
---------------
હિન્દુસ્થાન સમાચાર / GONDALIYA DISHANT
