અમરેલી, 21 એપ્રિલ (હિ.સ.)

અમરેલી જિલ્લામાં ફરી એકવાર ગેરકાયદેસર દારૂના વેપાર પર પોલીસે મોટી કાર્યવાહી હાથ ધરી છે. દામનગર વિસ્તારમાંથી અમરેલી એલ.સી.બી (લોકલ ક્રાઈમ બ્રાન્ચ) દ્વારા ઈંગ્લિશ દારૂનો જથ્થો ઝડપી પાડવામાં આવ્યો છે. પોલીસે કાર્યવાહી દરમિયાન આશરે 3.56 લાખ રૂપિયાના વિદેશી દારૂ સાથે એક શખ્સને દબોચી લીધો છે.

મળતી માહિતી મુજબ, એલ.સી.બીને બાતમી મળતાં જ ટીમ દ્વારા દામનગર વિસ્તારમાં ચેકિંગ હાથ ધરવામાં આવ્યું હતું. દરમિયાન શંકાસ્પદ હાલતમાં ફરી રહેલા એક વ્યક્તિને અટકાવી તેની તપાસ કરતા તેની પાસે મોટી માત્રામાં ઈંગ્લિશ દારૂ મળી આવ્યો હતો. પોલીસે તાત્કાલિક દારૂ જપ્ત કરી આરોપીની ધરપકડ કરી હતી.

પ્રાથમિક પૂછપરછમાં આરોપી દારૂ ક્યાંથી લાવ્યો હતો અને કોને સપ્લાય કરવાનો હતો તે અંગે માહિતી મેળવવાનો પ્રયાસ ચાલી રહ્યો છે. સમગ્ર મામલે પોલીસે ગુનો નોંધી આગળની કાર્યવાહી હાથ ધરી છે.

આ બનાવને પગલે જિલ્લામાં ગેરકાયદેસર દારૂના વેપાર સામે પોલીસ વધુ સક્રિય બની હોવાનું જોવા મળી રહ્યું છે. આગામી દિવસોમાં પણ આવા તત્વો સામે કડક કાર્યવાહી ચાલુ રહેશે તેવી પોલીસ દ્વારા ખાતરી આપવામાં આવી છે.

હિન્દુસ્થાન સમાચાર / Gondaliya Abhishek Nandrambhai