નવસારી, 30 એપ્રિલ (હિ.સ.): રાજ્ય સરકારે શહેરી પરિવહનને વધુ મજબૂત બનાવવા માટે મહત્વપૂર્ણ પગલું ભર્યું છે. નાયબ મુખ્યમંત્રી હર્ષ સંઘવીએ ‘મુખ્યમંત્રી શહેરી બસ સેવા યોજના’ હેઠળ નવસારી, વાપી અને પાલનપુરમાં કુલ 17 નવા બસ રૂટને મંજૂરી આપી છે. આ નિર્ણયથી જાહેર પરિવહન વધુ સુવિધાસભર બનશે અને નાગરિકોને સસ્તું તથા વિશ્વસનીય મુસાફરી વિકલ્પ મળશે.

યોજનાનુસાર નવસારીમાં 7 નવા રૂટ શરૂ થશે, જે શહેરના વિવિધ વિસ્તારો વચ્ચે ઝડપી જોડાણ સ્થાપિત કરશે. ઔદ્યોગિક હબ ગણાતા વાપીમાં 4 રૂટ ઉમેરાતા શ્રમિકો અને નોકરીયાત વર્ગને દૈનિક અવરજવરમાં સહુલિયત મળશે અને ખાનગી વાહનો ઉપરનો આધાર પણ ઓછો થશે.

પાલનપુરમાં 6 નવા રૂટ શરૂ થવાને કારણે આસપાસના ગ્રામ્ય વિસ્તારોમાંથી આવતા વિદ્યાર્થીઓ અને સામાન્ય નાગરિકોને સીધી અને સરળ પરિવહન સુવિધા મળશે. આ પગલાથી શહેરમાં ટ્રાફિકનો દબાણ ઘટવાની સાથે પર્યાવરણ પરનો પ્રભાવ પણ ઓછો થવાની શક્યતા છે.

સરકારના જણાવ્યા મુજબ, આ પહેલનો મુખ્ય હેતુ લોકોને સમયસર, આરામદાયક અને ખર્ચમાં બચતકારક મુસાફરી ઉપલબ્ધ કરાવવાનો છે. સાથે જ આધુનિક સુવિધાઓથી સજ્જ બસો શરૂ કરવાની તૈયારી ચાલી રહી છે, જે મુસાફરોને વધુ સુરક્ષિત અને અનુકૂળ અનુભવ આપશે.

---------------

હિન્દુસ્થાન સમાચાર / યજુવેન્દ્ર દુબે