સુરત, 30 એપ્રિલ (હિ.સ.) : સુરત શહેર 1 મે, 2026ના રોજ ઉજવાનારા ગુજરાત ગૌરવ દિનની રાજ્યસ્તરીય ઉજવણી માટે તૈયાર થઈ રહ્યું છે. ડુમ્મસ સી-ફેસ પર યોજાનાર આ ભવ્ય કાર્યક્રમમાં સાંસ્કૃતિક પ્રસ્તુતિઓ અને પોલીસ પરેડનું આયોજન કરાયું છે. મુખ્યમંત્રી ભુપેન્દ્ર પટેલની હાજરીને ધ્યાનમાં રાખીને મોટી સંખ્યામાં લોકો ભેગા થવાની શક્યતા છે.

ટ્રાફિક વ્યવસ્થા સુચારુ રાખવા માટે પોલીસ તંત્ર દ્વારા ખાસ પ્રતિબંધો લાગુ કરાયા છે. 1 મેના રોજ સવારે 8 વાગ્યાથી એસ.કે.નગરથી લઈને એરપોર્ટ, ડુમ્મસ સી-ફેસ અને SVNIT સર્કલ સુધીના વિસ્તારોમાં વાહન વ્યવહાર અને પાર્કિંગ પર રોક લગાવવામાં આવશે. આ નિર્ણયથી શહેરના કેટલાક મુખ્ય માર્ગો પર સામાન્ય અવરજવર પ્રભાવિત રહેશે.

આ પરિસ્થિતિને ધ્યાનમાં રાખીને સિટિલિંક દ્વારા BRTS રૂટમાં ફેરફારો જાહેર કરાયા છે. રૂટ નંબર 12 હવે ઓએનજીસીથી નહીં પરંતુ સોમેશ્વરથી સરથાણા સુધી જ ચાલશે, જ્યારે રૂટ નંબર 14 પણ ઓએનજીસી કોલોનીના બદલે પાલ RTOથી કોસાડ સુધી મર્યાદિત રહેશે. આ ફેરફારો કાર્યક્રમ પૂર્ણ થાય ત્યાં સુધી અમલમાં રહેશે.

સિટી બસ સેવાઓમાં પણ મોટા ફેરફારો કરવામાં આવ્યા છે. કેટલાક મહત્વના રૂટો સંપૂર્ણપણે બંધ રાખવામાં આવશે, જ્યારે અન્ય રૂટોને ડાયવર્ટ કરવામાં આવ્યા છે. સાથે સાથે, બાકી રૂટો પર બસોની આવર્તન પણ ઘટાડી દેવામાં આવશે. મુસાફરોને અનુકૂળતા માટે સત્તાવાળાઓએ અગાઉથી માહિતી મેળવીને યાત્રા કરવાની સલાહ આપી છે.

---------------

હિન્દુસ્થાન સમાચાર / યજુવેન્દ્ર દુબે