ભાવનગર, 08 એપ્રિલ (હિ.સ.) : આજરોજ કમિશનર દ્વારા કંસારા રીજુવેનેશન પ્રોજેક્ટ અંતર્ગત સાઇટ વિઝિટ કરવામાં આવી હતી. શહેરના વિકાસ અને પર્યાવરણના સંરક્ષણને ધ્યાનમાં રાખીને હાથ ધરાયેલા આ પ્રોજેક્ટની પ્રગતિની સ્થળ પર જઈ સમીક્ષા કરવામાં આવી હતી. કમિશનરે સંબંધિત અધિકારીઓ અને એજન્સીઓ સાથે ચર્ચા કરી અને કાર્યની ગુણવત્તા તેમજ ગતિ અંગે માર્ગદર્શન આપ્યું હતું.

સાઇટ વિઝિટ દરમિયાન પ્રોજેક્ટના વિવિધ તબક્કાઓની વિગતવાર માહિતી મેળવી હતી. ખાસ કરીને ડ્રેનેજ વ્યવસ્થા, પાણીના પ્રવાહનું સંચાલન, સફાઈ અને હરિયાળી વિકાસ જેવા મુદ્દાઓ પર વિશેષ ધ્યાન આપવામાં આવ્યું હતું. કમિશનરે જણાવ્યું હતું કે આ પ્રોજેક્ટ માત્ર સૌંદર્ય વધારવાનો નથી, પરંતુ શહેરના પર્યાવરણને સુધારવાનો મહત્વપૂર્ણ પ્રયાસ છે.તેમણે અધિકારીઓને કામને વધુ અસરકારક અને સમયમર્યાદામાં પૂર્ણ કરવા માટે સૂચનો આપ્યા હતા. સાથે જ, ગુણવત્તામાં કોઈપણ પ્રકારની કમી ન રહે તે માટે ખાસ ધ્યાન રાખવા કહ્યું હતું. પ્રોજેક્ટમાં આધુનિક તકનીકોનો ઉપયોગ કરીને લાંબા ગાળે લાભ મળે તે દિશામાં કાર્ય કરવાની પણ સલાહ આપવામાં આવી હતી.

આ પ્રસંગે પ્રોજેક્ટ સાથે જોડાયેલા ઇજનેરો, કોન્ટ્રાક્ટરો અને અન્ય સ્ટાફ હાજર રહ્યા હતા. કમિશનરે તમામને ટીમવર્ક સાથે કાર્ય કરીને પ્રોજેક્ટને ઝડપથી પૂર્ણ કરવાની પ્રેરણા આપી હતી.કંસારા રીજુવેનેશન પ્રોજેક્ટ પૂર્ણ થતા શહેરને એક નવી ઓળખ મળશે અને નાગરિકોને સ્વચ્છ અને સુવ્યવસ્થિત પર્યાવરણનો લાભ મળશે તેવી આશા વ્યક્ત કરવામાં આવી હતી.

---------------

હિન્દુસ્થાન સમાચાર / GONDALIYA DISHANT