સુરત, 01 મે (હિ.સ.) : ગુજરાતના ઔદ્યોગિક શહેર સુરતમાં શુક્રવારે દેશનો પ્રથમ ‘બેરિયરલેસ’ ટોલ પ્લાઝો શરૂ થયો છે. નવી ટોલિંગ સિસ્ટમ અમલમાં આવતા હવે વાહનચાલકોને ટોલ ટેક્સ માટે બેરિયર પાસે લાંબી કતારમાં ઊભા રહેવાની જરૂર રહેશે નહીં. કેન્દ્રીય માર્ગ પરિવહન અને રાજમાર્ગ મંત્રી નિતિન ગડકરીએ ગુજરાતમાં નેશનલ હાઈવે-48 પર સુરત-ભરૂચ વચ્ચે આવેલા ચોર્યાસી ટોલ પ્લાઝા પર દેશની પ્રથમ ‘મલ્ટી લેન ફ્રી ફ્લો’ (MLFF) બેરિયરલેસ ટોલિંગ સિસ્ટમના પ્રારંભની જાહેરાત કરી.

કેન્દ્ર સરકારની માહિતી મુજબ મુંબઈ-દિલ્હી હાઈવે (NH-48) પર કામરેજ નજીક આવેલા ચોર્યાસી ટોલ પ્લાઝા પર આ આધુનિક સિસ્ટમનું નેશનલ હાઇવે ઓથોરિટી ઓફ ઇન્ડિયા દ્વારા છેલ્લા બે મહિનાથી પરીક્ષણ કરવામાં આવી રહ્યું હતું. પરીક્ષણ સફળ રહેતા હવે તેને સંપૂર્ણ રીતે અમલમાં મુકવામાં આવી છે. આ સિસ્ટમ ઓટોમેટિક નંબર પ્લેટ રેકગ્નિશન (ANPR) ટેકનોલોજી પર આધારિત છે. હાઈવે પર લગાવવામાં આવેલા હાઈ-રિઝોલ્યુશન કેમેરા પસાર થતા વાહનોની નંબર પ્લેટ સ્કેન કરશે અને FASTag સાથે જોડાયેલા ખાતામાંથી ટોલની રકમ આપમેળે કપાઈ જશે. સમગ્ર પ્રક્રિયા સંપૂર્ણપણે ઓટોમેટિક અને કોન્ટેક્ટલેસ રહેશે. આ નવી વ્યવસ્થાથી વાહનચાલકો રોકાયા વગર આશરે 80 કિમી પ્રતિ કલાકની ઝડપે ટોલ પાર કરી શકશે. NHAIના અંદાજ મુજબ, આ સિસ્ટમથી દર વર્ષે લગભગ 1,500 કરોડ રૂપિયાનું ઇંધણ બચત થશે અને કામરેજ તેમજ ચોર્યાસી જેવા વ્યસ્ત ટોલ પ્લાઝા પર ટ્રાફિક જામમાં ઘટાડો થશે.

જો કોઈ વાહનમાં FASTag નહીં હોય, તો કેમેરા નંબર પ્લેટ સ્કેન કરીને ડિજિટલ ઈન્વોઈસ જનરેટ કરશે અને પછી દંડ સાથે ટોલ વસૂલ કરવામાં આવશે. વાહન ગમે તેવી ઝડપે પસાર થાય, તેની માહિતી તરત જ સેન્ટ્રલ સર્વર પર પહોંચીને ચકાસાઈ જશે. કેન્દ્ર સરકારનું લક્ષ્ય વર્ષ 2026ના અંત સુધીમાં દેશના 1050થી વધુ ટોલ પ્લાઝાને AI આધારિત ‘મલ્ટી લેન ફ્રી ફ્લો સિસ્ટમ’થી સજ્જ કરવાનો છે, જેથી મુસાફરી વધુ સરળ અને પર્યાવરણને અનુકૂળ બની શકે.

---------------

હિન્દુસ્થાન સમાચાર / યજુવેન્દ્ર દુબે