નવી દિલ્હી, 03 મે (હિ.સ.). ભારતીય બેડમિન્ટન ટીમને થોમસ કપ 2026ની સેમીફાઈનલમાં ફ્રાન્સ સામે 3-0થી હાર મળી. ભારતને કાંસ્ય પદકથી સંતોષ માનવો પડ્યો. ભારતીય ટીમના પ્રદર્શન પર ભારતીય બેડમિન્ટન સંઘે કહ્યું કે, ભલે પદકનો રંગ તે ન હોય જેની અમે અપેક્ષા રાખી હતી, પરંતુ વિશ્વ મંચ પર કાંસ્ય પદક હાંસલ કરવો એ ભારતીય બેડમિન્ટન માટે એક ખૂબ જ મોટી સિદ્ધિ છે.

ભારતીય બેડમિન્ટન સંઘ (બીએઆઈ) એ સોશિયલ મીડિયા 'એક્સ' પર લખ્યું કે, ભલે પરિણામ અમારા પક્ષમાં ન રહ્યું, પરંતુ કોર્ટ પર અમારા જોશ અને મક્કમ ઈરાદાએ વિશ્વને એ યાદ અપાવી દીધું કે, અમે ચેમ્પિયન કેમ છીએ. અમે આ અનુભવમાંથી મળેલી શીખ, યાદો અને કાંસ્ય પદક અમારી સાથે ઘરે લઈ જઈ રહ્યા છીએ. બીએઆઈ એ અન્ય એક પોસ્ટમાં જણાવ્યું કે અમે હજુ પણ વિશ્વની સર્વશ્રેષ્ઠ ટીમોમાંના એક છીએ. બેંગકોક 2022 થી લઈને ફરી એકવાર પોડિયમ સુધી- થોમસ કપમાં ભારતનો દબદબો કાયમ છે.

ફ્રાન્સના ક્રિસ્ટો પોપોવ, એલેક્સ લેનિયર અને ટોમા જુનિયર પોપોવે ભારતના આયુષ શેટ્ટી, કિદામ્બી શ્રીકાંત અને એચ.એસ. પ્રણોય સામે સીધી ગેમમાં જીત મેળવી. આ મેચમાં ભારતને સ્ટાર ખેલાડી લક્ષ્ય સેનની ખોટ સ્પષ્ટપણે વર્તાઈ, જે ઈજાના કારણે સેમીફાઈનલમાં રમી શક્યા નહોતા.

સિંગલ્સના પ્રથમ મુકાબલામાં ભારતીય ખેલાડી આયુષ શેટ્ટી વિશ્વના નંબર 4 ખેલાડી ક્રિસ્ટો પોપોવ સામે ટકી શક્યા નહીં. ફ્રાન્સના ખેલાડીએ ઝડપ અને ચોકસાઈનું પ્રદર્શન કરતા જબરદસ્ત રમત બતાવી. પોપોવે 21-11, 21-9 થી જીત મેળવીને ફ્રાન્સને 1-0ની સરસાઈ અપાવી દીધી.

બીજા સિંગલ્સ મુકાબલામાં અનુભવી ખેલાડી કિદામ્બી શ્રીકાંતનો સામનો ફ્રાન્સના એલેક્સ લેનિયર સામે થયો. શ્રીકાંતે મુકાબલામાં જોરદાર લડત આપી, પરંતુ લેનિયરે મહત્વની ક્ષણોમાં સંયમ જાળવી રાખીને 21-16, 21-18 થી જીત મેળવી.

ત્રીજી સિંગલ્સ ગેમમાં ભારતીય ટીમ માટે કરો અથવા મરોની સ્થિતિ હતી. અહીં એચ.એસ. પ્રણોયનો સામનો ફ્રેન્ચ ખેલાડી ટોમા જુનિયર પોપોવ સામે થયો. પ્રણોયે શરૂઆતી સરસાઈ મેળવી હતી, પરંતુ પોપોવે પોતાની ગતિ અને નિયંત્રણથી મેચ પલટી નાખી. આ રસાકસીભર્યા મુકાબલામાં ફ્રાન્સના ખેલાડીએ પ્રણોયને 21-19, 21-16 થી હરાવીને પોતાની ટીમને જીત અપાવી દીધી.

હિન્દુસ્થાન સમાચાર / વીરેન્દ્ર સિંહ / સુનીત નિગમ

હિન્દુસ્થાન સમાચાર / માધવી વ્યાસ