હોર્સન્સ (ડેનમાર્ક), નવી દિલ્હી, 04 મે (હિ.સ.) વિશ્વ નંબર-1 અને ઓલિમ્પિક ચેમ્પિયન આન સે-યંગના શાનદાર પ્રદર્શનની મદદથી દક્ષિણ કોરિયાએ ચીનને હરાવીને પ્રતિષ્ઠિત ઉબર કપનો ખિતાબ જીતી લીધો છે. પુરૂષ વર્ગના થોમસ કપમાં ચીને ફ્રાન્સને હરાવીને પોતાનો દબદબો જાળવી રાખ્યો હતો.

દક્ષિણ કોરિયાએ ત્રીજી વખત ઉબર કપ જીત્યો

દક્ષિણ કોરિયાએ ફાઈનલમાં ચીનને 3-1 થી હરાવીને ત્રીજી વખત ઉબર કપ પોતાના નામે કર્યો. ટીમની જીતમાં આન સે-યંગની ભૂમિકા સૌથી મહત્વની રહી હતી, જેમણે પ્રથમ સિંગલ્સ મુકાબલામાં વાંગ ઝીયીને 21-10, 21-13 થી હરાવીને ટીમને શાનદાર શરૂઆત અપાવી હતી.

ચીને પ્રથમ ડબલ્સ મુકાબલામાં તાન નિંગ અને લિયુ શેંગશુની જીતથી બરાબરી કરી હતી. પરંતુ ત્યારબાદ કિમ ગા-યુને ટોક્યો ઓલિમ્પિક ચેમ્પિયન ચેન યુફેઈને 21-19, 21-15 થી હરાવીને કોરિયાને સરસાઈ અપાવી દીધી હતી.

નિર્ણાયક ડબલ્સ મુકાબલામાં બેક હા-ના અને કિમ હ્યે-જોંગની જોડીએ જિયા યીફાન અને ઝાંગ શુશિયાનને 16-21, 21-10, 21-13 થી હરાવીને ખિતાબ પાકો કર્યો હતો.

ટીમ કેપ્ટન લી સો-હીએ જણાવ્યું હતું કે, “આન સે-યંગે જીતની શરૂઆત કરી. કિમ ગા-યુને પણ મુશ્કેલ મેચમાં શાનદાર પ્રદર્શન કર્યું, અમને તેમના પર ગર્વ છે.”

થોમસ કપમાં ચીનનો દબદબો યથાવત

પુરૂષ વર્ગમાં ચીને ફ્રાન્સને 3-1 થી હરાવીને થોમસ કપનો ખિતાબ જાળવી રાખ્યો હતો. આ ફ્રાન્સની પ્રથમ ફાઈનલ હતી, જે બેડમિન્ટનમાં તેના ઉભરતા પ્રદર્શનને દર્શાવે છે.

ફાઈનલના મુખ્ય પરિણામો

ઉબર કપ ફાઈનલ (દક્ષિણ કોરિયા 3-1 ચીન):

મહિલા સિંગલ્સ 1: આન સે-યંગે વાંગ ઝીયીને હરાવી (21-10, 21-13)

મહિલા ડબલ્સ 1: તાન નિંગ/લિયુ શેંગશુએ જીત નોંધાવી

મહિલા સિંગલ્સ 2: કિમ ગા-યુને ચેન યુફેઈને હરાવી

મહિલા ડબલ્સ 2: બેક હા-ના/કિમ હ્યે-જોંગે જીત અપાવી

થોમસ કપ ફાઈનલ (ચીન 3-1 ફ્રાન્સ):

પુરૂષ સિંગલ્સ 1: શી યુકીએ ક્રિસ્ટો પોપોવને હરાવ્યો

પુરૂષ સિંગલ્સ 2: એલેક્સ લેનિયરે લી શિફેંગને હરાવ્યો

પુરૂષ સિંગલ્સ 3: વેંગ હોંગ યાંગે ટોમા જુનિયર પોપોવને હરાવ્યો

પુરૂષ ડબલ્સ: હે જી ટિંગ/રેન શ્યાંગ યુએ જીત નોંધાવી

પદક વિજેતા

ઉબર કપ: સુવર્ણ – દક્ષિણ કોરિયા, રજત – ચીન, કાંસ્ય – જાપાન અને ઈન્ડોનેશિયા

થોમસ કપ: સુવર્ણ – ચીન, રજત – ફ્રાન્સ, કાંસ્ય – ભારત અને ડેનમાર્ક

હિન્દુસ્થાન સમાચાર / સુનીલ દુબે / સુનીત નિગમ

હિન્દુસ્થાન સમાચાર / માધવી વ્યાસ