નવી દિલ્હી, 06 મે (હિ.સ.). વિજ્ઞાન અને ટેકનોલોજીના ક્ષેત્રમાં સહયોગને વધુ મજબૂત કરવાની દિશામાં બુધવારે ભારત અને જાપાન વચ્ચે કરાર કરવામાં આવ્યો છે. આ માટે જાપાનના વિજ્ઞાન અને ટેકનોલોજી નીતિ મંત્રી ઓનોડા કિમીએ એક ઉચ્ચસ્તરીય પ્રતિનિધિમંડળ સાથે કેન્દ્રીય મંત્રી ડૉ. જિતેન્દ્ર સિંહ સાથે મુલાકાત કરી હતી.
આ બેઠકમાં બંને દેશો વચ્ચે સ્વાસ્થ્ય અને મેડિકલ ડિવાઇસના ક્ષેત્રમાં સહયોગ માટે કરાર કરવામાં આવ્યો હતો. આ કરાર જાપાન એજન્સી ફોર મેડિકલ રિસર્ચ એન્ડ ડેવલપમેન્ટ, ભારતીય આયુર્વિજ્ઞાન અનુસંધાન પરિષદ અને વિજ્ઞાન અને ટેકનોલોજી વિભાગ વચ્ચે થયો હતો.
આ ઉપરાંત, ક્વોન્ટમ સાયન્સ અને ટેકનોલોજીમાં સહયોગ વધારવા માટે જાપાનની કેબિનેટ ઓફિસ અને વિજ્ઞાન અને ટેકનોલોજી વિભાગ વચ્ચે લેટર ઓફ ઈન્ટેન્ટ પર પણ હસ્તાક્ષર કરવામાં આવ્યા હતા. આ પ્રસંગે ડૉ. જિતેન્દ્ર સિંહે જણાવ્યું હતું કે, વડાપ્રધાન નરેન્દ્ર મોદીની 2025માં જાપાનની મુલાકાત બાદ ભારત-જાપાન વિજ્ઞાન અને ટેકનોલોજી ભાગીદારી એક નવા તબક્કામાં પ્રવેશી ચુકી છે.
બંને દેશોની શક્તિનો સમન્વય
તેમણે કહ્યું કે, જાપાન પાસે અદ્યતન ટેકનોલોજી છે, જ્યારે ભારત પાસે યુવા અને કુશળ માનવ સંસાધનની મોટી શક્તિ છે. બંને મળીને નવી ટેકનોલોજીમાં ઝડપથી નવાચાર કરી શકે છે. જાપાનના વિજ્ઞાન અને ટેકનોલોજી નીતિ મંત્રી ઓનોડા કિમીએ ભારતની ઝડપી આર્થિક વૃદ્ધિ અને આર્ટિફિશિયલ ઇન્ટેલિજન્સના વ્યાપક ઉપયોગની પ્રશંસા કરી હતી. તેમણે ભારતીય યુવાનોમાં નવાચાર અને નિષ્ફળતાઓમાંથી શીખવાની ક્ષમતાને પણ વિશેષ ગણાવી હતી.
આ પ્રસંગે ક્વોન્ટમ અને હેલ્થ સેક્ટર પર ફોકસ
બેઠકમાં નેશનલ ક્વોન્ટમ મિશન, ક્વોન્ટમ કોમ્પ્યુટિંગ, સુરક્ષિત સંચાર અને હેલ્થ રિસર્ચ જેવા ક્ષેત્રોમાં સહયોગ વધારવા અંગે ચર્ચા કરવામાં આવી હતી. સાથે જ રિસર્ચ, ઇન્ડસ્ટ્રી અને સ્ટાર્ટઅપ્સ વચ્ચેની ભાગીદારીને મજબૂત કરવા પર પણ ભાર મૂકવામાં આવ્યો હતો. બંને દેશોએ રિસર્ચ સહયોગ, સંયુક્ત પ્રોજેક્ટ્સ અને વૈજ્ઞાનિકોના આદાન-પ્રદાનને વધારવા પર સહમતિ દર્શાવી હતી. તેનો હેતુ નવી ટેકનોલોજીને ઝડપથી વિકસિત કરીને તેમને સામાન્ય લોકો સુધી પહોંચાડવાનો છે.
હિન્દુસ્થાન સમાચાર / વિજયાલક્ષ્મી / સુનીત નિગમ
હિન્દુસ્થાન સમાચાર / ડો.હિતેશ એન.વ્યાસ
