નવી દિલ્હી, 27 જૂન (હિ.સ.). કેન્દ્રીય આરોગ્ય અને પરિવાર કલ્યાણ મંત્રાલય 29 જૂને વિજ્ઞાન ભવન ખાતે કેન્દ્રીય આરોગ્ય અને પરિવાર કલ્યાણ પરિષદ (સીસીએચએફડબલ્યુ) ની 16મી બેઠક યોજશે. આ બેઠકની અધ્યક્ષતા કેન્દ્રીય આરોગ્ય અને પરિવાર કલ્યાણ મંત્રી જે.પી. નડ્ડા કરશે. આ દરમિયાન કેન્દ્રીય આરોગ્ય રાજ્ય મંત્રી અનુપ્રિયા પટેલ અને પ્રતાપરાવ જાધવ પણ ઉપસ્થિત રહેશે.

આરોગ્ય મંત્રાલયે શનિવારે માહિતી આપી હતી કે, આ બેઠકમાં રાજ્યો અને કેન્દ્રશાસિત પ્રદેશોના આરોગ્ય અને પરિવાર કલ્યાણ મંત્રીઓ, સાંસદો, કેન્દ્ર અને રાજ્ય સરકારોના વરિષ્ઠ અધિકારીઓ, બિન-સરકારી સભ્યો અને આરોગ્ય ક્ષેત્રના નિષ્ણાતો ભાગ લેશે. આ પરિષદનો ઉદ્દેશ્ય આરોગ્ય ક્ષેત્રે કેન્દ્ર અને રાજ્યો વચ્ચેના સમન્વયને મજબૂત કરવાનો અને મહત્વપૂર્ણ નીતિગત મુદ્દાઓ પર વ્યાપક ચર્ચા કરવાનો છે.

આ પરિષદમાં રાષ્ટ્રીય આરોગ્ય મિશન (એનએચએમ) ના એસડીજી લક્ષ્યો અને પ્રાથમિકતાઓ, ખાદ્ય અને ઔષધ સુધારણા તેમજ સહાયક આરોગ્ય સેવાઓ સંબંધિત વિષયો પર મંથન કરવામાં આવશે. આ સાથે વિવિધ આરોગ્ય યોજનાઓની પ્રગતિની સમીક્ષા કરવા, રાજ્યોની શ્રેષ્ઠ પદ્ધતિઓ શેર કરવા, નવા પડકારોની ઓળખ કરવા અને દેશભરમાં આરોગ્ય સેવાઓને વધુ અસરકારક બનાવવા માટે સંયુક્ત વ્યૂહરચના તૈયાર કરવા અંગે પણ ચર્ચા કરવામાં આવશે.

ઉલ્લેખનીય છે કે, કેન્દ્રીય આરોગ્ય અને પરિવાર કલ્યાણ પરિષદની રચના બંધારણની કલમ 263 હેઠળ કરવામાં આવી છે. આ પરિષદ આરોગ્ય અને પરિવાર કલ્યાણ મંત્રાલયની સર્વોચ્ચ સલાહકાર સંસ્થા છે, જે તબીબી અને જાહેર આરોગ્ય સંબંધિત નીતિઓ અને કાર્યક્રમોના અમલીકરણની સમીક્ષા કરીને રાજ્યો અને કેન્દ્રશાસિત પ્રદેશો સાથે સમન્વય સ્થાપિત કરવામાં મહત્વપૂર્ણ ભૂમિકા ભજવે છે.

આ પરિષદ આરોગ્ય ક્ષેત્રે સહકારી સંઘવાદને મજબૂત કરવા અને કેન્દ્ર-રાજ્ય વચ્ચેના બહેતર તાલમેલ દ્વારા જાહેર આરોગ્ય કાર્યક્રમોના અસરકારક અમલીકરણની દિશામાં મહત્વપૂર્ણ માનવામાં આવી રહી છે.

હિન્દુસ્થાન સમાચાર / વિજયાલક્ષ્મી / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ