કચ્છ, 27 જૂન (હિ.સ.) : કચ્છ સહિત ગુજરાતના ખેડૂતોના જમીન અધિકારો અને વીજ કંપનીઓની કથિત મનમાની નીતિઓ સામે હવે વિરોધનું સ્વરૂપ વધુ ઉગ્ર બનતું જોવા મળી રહ્યું છે. ખેડૂતોના પ્રશ્નોને રાજ્યવ્યાપી સ્તરે ઉજાગર કરવા માટે કોંગ્રેસ દ્વારા આયોજિત ‘ખેડૂત અધિકાર પદયાત્રા’નો પ્રારંભ આજે કચ્છના ઐતિહાસિક વ્રજવાણી ગામેથી કરવામાં આવ્યો છે. આ યાત્રા માત્ર વિરોધ પૂરતી મર્યાદિત નથી, પરંતુ ખેડૂતોના અધિકારો માટે ન્યાયની માંગ સાથે સરકારનું ધ્યાન દોરવાનો પ્રયાસ પણ છે.

પદયાત્રાના પ્રારંભ પહેલાં વ્રજવાણી ખાતે ધાર્મિક માહોલ વચ્ચે દ્વારકાધીશ મંદિરે ચડાવવામાં આવનારી પવિત્ર ધજાનું વિધિવત પૂજન કરવામાં આવ્યું હતું. યાત્રાના આયોજકોના જણાવ્યા મુજબ, સમગ્ર પદયાત્રા પૂર્ણ થયા બાદ દ્વારકાધીશ મંદિરે ધ્વજારોહણ કરીને ખેડૂતોના હિતમાં યોગ્ય નિર્ણય લેવા માટે સરકારને સદબુદ્ધિ મળે તેવી પ્રાર્થના કરવામાં આવશે.

આંદોલન દરમિયાન ખેડૂત આગેવાનો અને કોંગ્રેસના નેતાઓએ આરોપ લગાવ્યો કે વિવિધ ખાનગી તેમજ સરકારી વીજ કંપનીઓ ખેડૂતોની મંજૂરી વિના તેમની જમીનમાં વીજ પોલ અને ટ્રાન્સમિશન લાઈનો ઉભી કરીને ખેતીલાયક જમીનને અસર પહોંચાડી રહી છે. ખેડૂતોનો દાવો છે કે આવી કામગીરીના કારણે તેમની ખેતી, આવક અને જમીનના અધિકારો પર સીધી અસર પડી રહી છે, જેના કારણે ગ્રામ્ય વિસ્તારોમાં અસંતોષનો માહોલ સર્જાયો છે.

ખેડૂત સંગઠનોનું કહેવું છે કે જ્યાં સુધી સરકાર ખેડૂતોની વાજબી માંગણીઓને સ્વીકારીને યોગ્ય ઉકેલ લાવશે નહીં, ત્યાં સુધી આ લડત સતત ચાલુ રહેશે. આંદોલનને વધુ વ્યાપક બનાવવા માટે વિવિધ તાલુકાઓ અને જિલ્લાઓમાંથી ખેડૂતો મોટી સંખ્યામાં જોડાઈ રહ્યા છે.

આ પદયાત્રામાં કોંગ્રેસના વરિષ્ઠ નેતા અને ખેડૂત આગેવાન પાલ આંબલિયા, સામાજિક-રાજકીય કાર્યકર લાલજી દેસાઈ, કરશનદાસ બાપુ ભાદરકા સહિત કચ્છના અનેક સ્થાનિક આગેવાનો ઉપસ્થિત રહી ખેડૂતોને સમર્થન આપી રહ્યા છે. તેઓ ખેડૂતોના પ્રશ્નોને રાજ્ય સરકાર સુધી અસરકારક રીતે પહોંચાડવા માટે સંકલ્પબદ્ધ હોવાનું જણાવી રહ્યા છે.

વ્રજવાણીથી નીકળેલી પ્રથમ પદયાત્રા રાપર અને ભચાઉ તાલુકાના વિવિધ ગામોમાંથી પસાર થઈને મોરબી જિલ્લાના માળિયા મિયાણા માર્ગે જામનગર જિલ્લાના ધ્રોલ સુધી પહોંચશે. બીજી તરફ, ખેડૂતોના સમર્થનમાં બીજી પદયાત્રા આગામી 30 જૂનથી સુરેન્દ્રનગર જિલ્લાના ધ્રાંગધ્રા તાલુકાના કોંઢ ગામેથી શરૂ થશે. આ યાત્રા હળવદ, થાન, વાંકાનેર અને ટંકારા સહિતના વિસ્તારોમાંથી પસાર થઈને ધ્રોલ ખાતે પહોંચશે.

ધ્રોલ ખાતે બંને પદયાત્રાઓનું મહાસંગમ યોજાશે, જ્યાં મોટી સંખ્યામાં ખેડૂતો અને સમર્થકો એકત્રિત થશે. ત્યારબાદ બંને યાત્રાઓ સંયુક્ત રીતે દ્વારકા તરફ પ્રસ્થાન કરશે અને અંતિમ તબક્કે દ્વારકાધીશ મંદિરે ધ્વજારોહણ સાથે ખેડૂતોના હિત માટે સંકલ્પ વ્યક્ત કરશે.

ખેડૂતોના અધિકારો, જમીનના સંરક્ષણ અને વીજ કંપનીઓની નીતિઓ સામે શરૂ થયેલી આ પદયાત્રા હવે માત્ર કચ્છ પૂરતી મર્યાદિત રહી નથી, પરંતુ સમગ્ર ગુજરાતના ખેડૂતોના પ્રશ્નોને કેન્દ્રસ્થાને લાવતું મહત્વપૂર્ણ જનઆંદોલન બની રહ્યું છે.

---------------

હિન્દુસ્થાન સમાચાર / Rohit Ramjibhai Padhiyar