સુરત, 19 જુલાઈ (હિ.સ.) : કેન્દ્રીય ઔદ્યોગિક સુરક્ષા દળ (CISF)એ ફરી એકવાર પોતાની પ્રામાણિકતા અને ફરજ પ્રત્યેની નિષ્ઠાનો ઉત્તમ દાખલો રજૂ કર્યો છે. સુરત એરપોર્ટ પર એક મહિલા મુસાફરનું અંદાજે ₹3.5 લાખની કિંમતનું સોનાનું કંગન માત્ર 24 કલાકમાં શોધી કાઢી સુરક્ષિત રીતે પરત આપવામાં આવ્યું હતું.

માહિતી મુજબ, રિયા જૈન ઈન્ડિગોની ફ્લાઇટ 6E-465 દ્વારા બેંગલુરુથી સુરત આવી હતી. એરપોર્ટની બહાર નીકળ્યા બાદ તેમને જાણ થઈ કે તેમના હાથનું સોનાનું કંગન ક્યાંક ગુમ થઈ ગયું છે. તેમણે તરત જ સુરત એરપોર્ટ પર ફરજ બજાવતા CISF અધિકારીઓને જાણ કરી.

ફરિયાદ મળતા જ CISFની ટીમે એરોબ્રિજ, આગમન વિસ્તાર, બેગેજ ક્લેમ સહિત તમામ સ્થળોએ તપાસ હાથ ધરી. સાથે જ CCTV ફૂટેજની ઝીણવટભરી તપાસ કરવામાં આવી. તપાસ દરમિયાન જાણવા મળ્યું કે એરોબ્રિજ પરથી પસાર થતી વખતે રિયા જૈનના હાથમાંથી કંગન નીચે પડી ગયું હતું, જેને તેમની પાછળ આવી રહેલા એક સહ-મુસાફરે ઉઠાવી લીધું હતું અને કોઈને જાણ કર્યા વિના પોતાની સાથે લઈ ગયો હતો.

ત્યારબાદ CISFએ ફ્લાઇટના મુસાફરોની વિગતો મેળવી બેંગલુરુ એરપોર્ટની વિજિલન્સ ટીમ સાથે સંકલન સાધ્યું. બંને એરપોર્ટના સંયુક્ત પ્રયાસોથી સંબંધિત મુસાફરની ઓળખ કરી તેનો સંપર્ક કરવામાં આવ્યો. ત્યારબાદ તેને સુરત એરપોર્ટ બોલાવવામાં આવ્યો, જ્યાં તેણે અધિકારીઓની હાજરીમાં કંગન પરત કર્યું. જરૂરી ચકાસણી અને કાયદાકીય પ્રક્રિયા પૂર્ણ કર્યા બાદ કંગન તેની મૂળ માલિક રિયા જૈનને સોંપવામાં આવ્યું.

પોતાનું કિંમતી કંગન પરત મળતાં રિયા જૈન અને તેમના પરિવારે CISFના જવાનોનો દિલથી આભાર વ્યક્ત કર્યો હતો. આ ઘટનાએ ફરી એકવાર સાબિત કર્યું છે કે CISF માત્ર સુરક્ષા પૂરતી મર્યાદિત નથી, પરંતુ મુસાફરોની સેવા, વિશ્વાસ અને પ્રામાણિકતા જાળવવામાં પણ અગ્રેસર છે.

---------------

હિન્દુસ્થાન સમાચાર / યજુવેન્દ્ર દુબે