અમરેલી,01 ઓગસ્ટ (હિ.સ.) અમરેલી શહેરમાં મહાદેવ રસ અને હરિઓમ પેંડા દ્વારા નગરપાલિકાના ડિવાઈડર રોડ પર આયુર્વેદિક ઔષધિય છોડ તેમજ ડેકોરેટિવ વૃક્ષોના વાવેતરનો અનોખો કાર્યક્રમ યોજાયો હતો. આ પ્રસંગે રાજ્યના મંત્રી કૌશિક વેકરિયા વિશેષ ઉપસ્થિત રહ્યા હતા અને વૃક્ષારોપણ કરીને પર્યાવરણ સંરક્ષણનો સંદેશ આપ્યો હતો.

કાર્યક્રમ દરમિયાન વિવિધ પ્રકારના આયુર્વેદિક અને શોભાના છોડનું વાવેતર કરવામાં આવ્યું હતું. મંત્રી કૌશિક વેકરિયાએ જણાવ્યું હતું કે પર્યાવરણનું જતન કરવું એ દરેક નાગરિકની સામૂહિક જવાબદારી છે. વૃક્ષો માત્ર હરિયાળી જ વધારતા નથી, પરંતુ સ્વચ્છ હવા, સંતુલિત વાતાવરણ અને આગામી પેઢી માટે સ્વસ્થ પર્યાવરણનું નિર્માણ કરવામાં પણ મહત્વપૂર્ણ ભૂમિકા ભજવે છે.

આ પ્રસંગે શહેરના આગેવાનો, નગરપાલિકાના પ્રતિનિધિઓ, સામાજિક કાર્યકરો અને મોટી સંખ્યામાં નાગરિકો ઉપસ્થિત રહ્યા હતા. આયોજકો દ્વારા શહેરના મુખ્ય માર્ગોને હરિયાળા બનાવવા માટે ભવિષ્યમાં પણ આવા વૃક્ષારોપણ કાર્યક્રમો યોજવાની પ્રતિબદ્ધતા વ્યક્ત કરવામાં આવી હતી.

કાર્યક્રમમાં ઉપસ્થિત સૌએ વધુમાં વધુ વૃક્ષો વાવી તેમની જાળવણી કરવાનો સંકલ્પ લીધો હતો. ચાલો, સાથે મળીને અમરેલીને વધુ હરિયાળું અને સ્વચ્છ બનાવીએ એવા સંદેશ સાથે કાર્યક્રમનું સમાપન થયું હતું.

હિન્દુસ્થાન સમાચાર / Gondaliya Abhishek Nandrambhai