નવી દિલ્હી, 04 ઓગસ્ટ (હિ.સ.) પંજાબી ગાયિકા અફસાના ખાનનું ઇન્સ્ટાગ્રામ એકાઉન્ટ હેક થયું છે. તેણીએ એક વીડિયોમાં તેના ચાહકોને આ વાતની જાણકારી આપી હતી. અફસાનાએ જણાવ્યું હતું કે, તેનું એકાઉન્ટ પુનઃપ્રાપ્ત કરવાની પ્રક્રિયા ચાલુ છે અને ત્યાં સુધી, તેઓએ તેના ઇન્સ્ટાગ્રામ એકાઉન્ટમાંથી કોઈપણ સંદેશા અથવા લિંક પર વિશ્વાસ ન કરવો જોઈએ. તેણીએ ચાહકોને વિનંતી કરી હતી કે, તેણીના એકાઉન્ટમાંથી કોઈપણ શંકાસ્પદ સંદેશાને અવગણો અને કોઈપણ લિંક પર ક્લિક ન કરો.

વિડીયોમાં, અફસાનાએ હેકિંગની ઘટના પર પોતાની નારાજગી વ્યક્ત કરતા કહ્યું હતું કે, ઇન્સ્ટાગ્રામ તેના માટે માત્ર એક સોશિયલ મીડિયા પ્લેટફોર્મ નથી, પરંતુ તેના ચાહકો સાથે જોડાવા અને તેની વ્યાવસાયિક પ્રવૃત્તિઓ વિશે માહિતી શેર કરવા માટે એક મહત્વપૂર્ણ માધ્યમ છે. તેણીએ ઉમેર્યું હતું કે કોઈના અંગત એકાઉન્ટનો આવો દુરુપયોગ સંપૂર્ણપણે અસ્વીકાર્ય છે. ગાયિકાએ જણાવ્યું હતું કે, તેણીએ એકાઉન્ટ પુનઃપ્રાપ્તિ માટે જરૂરી પ્રક્રિયા શરૂ કરી છે અને તેણીને ટૂંક સમયમાં તેણીનું એકાઉન્ટ પાછું મળવાની આશા છે.

અફસાના ખાન પંજાબી સંગીત ઉદ્યોગમાં એક લોકપ્રિય ગાયિકા છે. તેણીએ 2012 માં રિયાલિટી શો વોઇસ ઓફ પંજાબ સીઝન 3 થી પોતાની કારકિર્દીની શરૂઆત કરી હતી. સ્વર્ગસ્થ ગાયક સિદ્ધુ મૂસેવાલા સાથે ગયેલા ગીતો, તિતલિયાં અને ધક્કા જેવા ગીતોએ તેમને ઓળખ અપાવી. તે 2021 માં સલમાન ખાનના રિયાલિટી શો બિગ બોસ 15 માં પણ જોવા મળી હતી. રણવીર સિંહની આગામી ફિલ્મ ધુરંધર ના નાલ નચના ગીતને પોતાનો અવાજ આપ્યા બાદ તે હાલમાં ફરીથી સમાચારમાં છે.

હિન્દુસ્થાન સમાચાર / લોકેશ ચંદ્ર દુબે / રામાનુજ શર્મા

હિન્દુસ્થાન સમાચાર / માધવી વ્યાસ