- સગીર બાળકને સુરક્ષિત આશ્રયસ્થાને પહોંચાડ્યો તથા ₹60,000ની કિંમતનો મુસાફરનો સામાન સુરક્ષિત પરત કર્યો

ભાવનગર, 18 સપ્ટેમ્બર (હિ.સ.) : મુસાફરોની સુરક્ષા, સહાય અને માનવીય સંવેદનાઓ પ્રત્યેની પોતાની પ્રતિબદ્ધતા નિભાવતા પશ્ચિમ રેલવેના ભાવનગર મંડળ પર RPF દ્વારા ‘ઓપરેશન નન્હે ફરિશ્તે’ તથા ‘ઓપરેશન અમાનત’ હેઠળ બે સરાહનીય કામગીરી કરવામાં આવી હતી.

તા. 16 સપ્ટેમ્બર 2026ના રોજ ગાંધીગ્રામ રેલવે સ્ટેશનના પ્લેટફોર્મ નંબર 01 પર ફરજ દરમિયાન RPFના હેડ કોન્સ્ટેબલ નરેન્દ્રસિંહ યાદવને 08 વર્ષનો એક સગીર બાળક મળી આવ્યો હતો. પૂછપરછ દરમિયાન બાળક દ્વારા સંતોષકારક માહિતી ન આપવામાં આવતાં તેને RPF કાર્યાલય, ગાંધીગ્રામ ખાતે લાવવામાં આવ્યો હતો. પૂછપરછમાં બાળકે જણાવ્યું કે પિતાની ઠપકાથી નારાજ થઈને તે કોઈને જાણ કર્યા વગર ટ્રેનમાં બેસીને ઘરેથી નીકળી ગયો હતો.

આ અંગેની જાણકારી નિરીક્ષક, બોટાદને આપવામાં આવી હતી. તેમના નિર્દેશ અનુસાર બાળકના સંરક્ષણની કાર્યવાહી હાથ ધરતાં GRP સાબરમતી, બાળ કલ્યાણ સમિતિ (CWC), એલિસબ્રિજ, અમદાવાદ તથા સ્ટેશન માસ્ટર, ગાંધીગ્રામને જાણ કરવામાં આવી હતી. બાળકની જરૂરી તબીબી તપાસ વી.એસ. હોસ્પિટલ ખાતે કરાવવામાં આવી હતી. દરમિયાન બાળકની માતા RPF આઉટ પોસ્ટ, ગાંધીગ્રામ ખાતે પહોંચી હતી. જરૂરી કાગળપત્રોની કાર્યવાહી પૂર્ણ કર્યા બાદ ASI લક્ષ્મણસિંહ પરમાર તથા હેડ કોન્સ્ટેબલ નરેન્દ્રસિંહ યાદવ દ્વારા બાળકને પ્રયાસ શોર્ટ સ્ટે શેલ્ટર હોમ, સરસપુર, અમદાવાદ ખાતે સુરક્ષિત રીતે સોંપવામાં આવ્યો હતો.

આ માનવીય અને સંવેદનશીલ કામગીરી માટે હેડ કોન્સ્ટેબલ નરેન્દ્રસિંહ યાદવની કાર્યકુશળતા, સતર્કતા તથા તત્પરતા પ્રશંસનીય રહી હતી.

‘ઓપરેશન અમાનત’ હેઠળ ₹60,000ની કિંમતનો સામાન મુસાફરને પરત કર્યો.

તા. 17 સપ્ટેમ્બર 2026ના રોજ સવારી ગાડી નંબર 19120 (વેરાવળ–ગાંધીનગર) દ્વારા મુસાફરી કરી રહેલા એક મુસાફરે RPF પોસ્ટ, જૂનાગઢ ખાતે જાણ કરી કે જૂનાગઢ સ્ટેશન પર ઉતરતી વખતે તેમનો લેપટોપ બેગ ટ્રેનમાં જ રહી ગયો છે. બેગમાં આશરે ₹50,000ની કિંમતનો Samsung લેપટોપ, આશરે ₹10,000ની કિંમતનો Vivo Y100 મોબાઇલ ફોન તથા અન્ય મહત્વપૂર્ણ દસ્તાવેજો હતા. સામાનની કુલ અંદાજિત કિંમત આશરે ₹60,000 હતી.

મુસાફર દ્વારા આપવામાં આવેલી માહિતીના આધારે હેડ કોન્સ્ટેબલ ગોવિંદ ડાકી તથા હેડ કોન્સ્ટેબલ વાલજીભાઈએ ઓન-ડ્યુટી સુરક્ષા દળ, વડાલનો સંપર્ક કરી ટ્રેનમાં સામાનની શોધખોળ કરાવી હતી. સામાન મળી આવ્યા બાદ સવારી ગાડી નંબર 59558 (ભાવનગર–વેરાવળ) દ્વારા તેને જૂનાગઢ લાવવામાં આવ્યો હતો. જરૂરી ચકાસણી કર્યા બાદ બેગ તથા સામાન યોગ્ય સ્થિતિમાં તેના વાસ્તવિક માલિકને સુરક્ષિત રીતે સોંપવામાં આવ્યો હતો.

આ બંને કિસ્સાઓમાં RPF કર્મચારીઓ દ્વારા દર્શાવવામાં આવેલી સતર્કતા, તત્પરતા, કર્તવ્યનિષ્ઠા તથા માનવીય સંવેદનશીલતા મુસાફરો પ્રત્યે રેલવેની પ્રતિબદ્ધતાને દર્શાવે છે.

મંડળ રેલ પ્રબંધક, ભાવનગર, દિનેશ વર્માએ RPF કર્મચારીઓની સરાહનીય કામગીરીની પ્રશંસા કરતાં જણાવ્યું હતું કે મુસાફરોની સુરક્ષા અને સહાય ઉપરાંત જરૂરિયાતમંદ મુસાફરો તથા બાળકોની મદદ કરવી પણ રેલવેની પ્રાથમિક જવાબદારીઓમાં સામેલ છે.

મંડળ સુરક્ષા આયુક્ત, ભાવનગર, અજય શર્માના માર્ગદર્શન હેઠળ ભાવનગર મંડળ RPF દ્વારા મુસાફરોની સહાય તેમજ તેમના છૂટી ગયેલા સામાનની સુરક્ષિત રીતે શોધખોળ અને પરત સોંપણી માટે સતત અસરકારક અને સંવેદનશીલ કાર્યવાહી કરવામાં આવી રહી છે.

વરિષ્ઠ મંડળ વાણિજ્ય પ્રબંધક, ભાવનગર, અતુલ કુમાર ત્રિપાઠીએ જણાવ્યું હતું કે મુસાફરોનો છૂટી ગયેલો સામાન સુરક્ષિત રીતે તેના વાસ્તવિક માલિક સુધી પહોંચાડવો એ રેલવેની મુસાફર સેવા, સંવેદનશીલતા અને સામાજિક જવાબદારીનો મહત્વપૂર્ણ હિસ્સો છે.

પશ્ચિમ રેલવે મુસાફરોની સેવા, સુરક્ષા અને વિશ્વાસને સર્વોચ્ચ પ્રાથમિકતા આપીને સુરક્ષિત, સુખદ અને સુવિધાજનક રેલ મુસાફરી સુનિશ્ચિત કરવા માટે સતત પ્રતિબદ્ધ છે.

--------------

હિન્દુસ્થાન સમાચાર / ભરતસિંહ જાદવ